Tórt urpaǵy áskerı qyzmetti jalǵastyrǵan otbasy «Máńgi esimizde» aktsııasyna qatysýda - QR QM

ASTANA. QazAqparat - Qazaqstandyq ofıtser Dáýlet Álimjanovtyń otbasy óz áýletterinde áskerı qyzmet atqaryp kele jatqan tórtinshi urpaq. Dańqty áskerı isti olardyń otbasynda osydan 74 jyl buryn batyr maıdanger atasy bastaǵan, odan keıin áskerı joldy uly, nemeresi jáne shóberesi jalǵastyrdy.

«Meniń atam Ǵabdýlqaıyr Álimjanov 1941 jyldyń shildesinde Qyzyl armııa qataryna shaqyryldy. Ol Tıýmendegi birinshi jaıaý áskerler áskerı ýchılışesinde oqydy. Bir jyldan soń «kishi serjant» áskerı ataǵyn alyp 53 armııasyndaǵy 235 atqyshtar dıvızııasy 806 atqyshtar polk quramynda soltústik-batys maıdanǵa attandy», - deıdi QR QM Kadrlar departamenti bastyǵynyń orynbasary polkovnık Dáýlet Álimjanov.

Maıdanger jaý shabýylyna qarsy urystardyń birinde sol aıaǵynan jaraqattanady. Asqynýyna baılanysty aıaǵyn kesýge týra keldi. 1944 jyly Ǵabdýlqaıyr Álimjanov áskerı-dárigerlik komıssııanyń sheshimimen áskerı qyzmetti odan ári jalǵastyrýǵa múmkindigi joq ІІ top múgedegi dep tanyldy.

«Atam balalary men nemerelerine soǵys jaıynda kóp áńgimeler aıtyp beretin. Dál osy ǵıbrat meniń ákem Abylaı Álimjanovtyń, odan keıin meniń armııa qyzmetine barýyma túrtki boldy», - deıdi ofıtser.

Dáýlet Álimjanovtyń ózi Qarýly Kúshterinde 1992 jyldan beri qyzmet etip keledi. Qazir otbasynyń maqtanyshyna aınalǵan áskerı isti uly - Danııar jalǵastyrmaq. Ol - Radıoelektronıka jáne baılanys áskerı-ınjenerlik ınstıtýtynyń úshinshi kýrsynda oqıdy.

Álimjanovtar óz otbasynyń urpaqtan urpaqqa jalǵasyp kele jatqan dástúrin qurmetteıdi. Osyndaı taǵylymdy muragerlik ister qazaqstandyq áskerı qyzmetshiler arasynda az emes. «Máńgi esimizde» aktsııasyna qatysý arqyly olar UOS batyrlaryna degen qurmetin bildirip, kez kelgen ýaqytta abyroıly áskerı qyzmettiń mańyzdylyǵyn kórsetedi.

Esterińizge sala keteıik, búgin «Máńgi esimizde» aktsııasyna qatysýshylardan ótinish qabyldaý aıaqtaldy. Osy is-sharanyń resmı bastalǵan kúninen bastap elimizdiń túrli óńirlerinen QR QK elý áskerı qyzmetshisi ózderiniń Uly Otan soǵysyna qatysqan týystary men tanystary týraly erekshe estelikterimen bólisti.

Ústimizdegi jyldyń 4 mamyry kúni osynaý aktsııanyń qorytyndysyna arnalǵan estelik sharasy ótedi, dep habarlaıdy QR Qorǵanys mınıstrliginiń baspasóz qyzmeti.