Tórt tutqyn 12 metrlik týnnel qazyp, túrmeden qashyp ketken
ASTANA. QazAqparat - Indonezııalyq polıtseıler Balı aralyndaǵy túrmeden onyń qabyrǵalarynyń astynan týnnel qazyp, qashyp ketken tórt tutqyndy izdestirýde.
Qashyp ketkender aýstralııalyq Shon Edvard Devıdson, bolgar Dımıtar Nıkolov Ilıev, úndistandyq Saıed Mýhammad Saıd jáne malaızııalyq Tı Kok Tıng bolyp shyqty.
Túrmeden qashý 19 maýsym kúni tańerteń uzyndyǵy 12 metr jáne eni 50 santımetrlik tonnel arqyly júzege asqan.
33 jastaǵy Shon Edvard Devıdsonnyń jazasyn óteıtin nebári eki aıy ǵana qalǵan edi, ol Indonezııaǵa basqa bireýdiń tólqujatymen kelgeni úshin sottalǵan. 31 jastaǵy Saıed Mýhammad Saıd esirtki kontrabandasy úshin 12 jylǵa bas bostandyǵynan aıyrylsa, 43 jastaǵy Ilıev qarjylyq qylmys jasaǵany úshin 7 jylǵa sottaldy. 50 jastaǵy Tı Kok Tıng esirtkige baılanysty qylmys jasaǵany úshin 7 jarym jylǵa abaqtyǵa jabylǵan, dep jazdy Daily Mail.
Alǵashqy 323 sottalýshyǵa arnalyp salynǵan "Kerobokan" túrmesinde 1300 qylmysker jazasyn óteýde. Adam kóp bolǵandyqtan túrmedegi jaǵdaı óte aýyr.
