Tórt túligin kóshege jibergen 100 túrkistandyq aıyppul tóledi
Túrkistan oblysynda tórt túligin kóshege qaraýsyz jibergen 97 mal ıesine QR Ákimshilik quqyqbuzýshylyq týraly kodekstiń 408-baby («Aýyl sharýashylyǵy janýarlaryn jaıý qaǵıdalaryn buzý») boıynsha jaza qoldanyldy.
Al Sozaq aýdanynda veterınarııalyq qujatsyz mal tasymaldaǵan 11 avtokólik anyqtalyp, ıelerine hattama toltyryldy. Sondaı-aq QR ÁQQTK-niń 406-babyna («Qazaqstan Respýblıkasynyń veterınarııa salasyndaǵy zańnamasyn buzý») sáıkes is qujattary jınaqtalyp, Aýyl sharýashylyǵy mınıstrligi Veterınarııalyq baqylaý jáne qadaǵalaý komıtetiniń aýdandyq aýmaqtyq ınspektsııasyna joldandy.
«Jol boıynda qaraýsyz júretin iri-qara mal kesirinen oryn alatyn jol-kólik oqıǵalarynyń aldyn alý maqsatynda josparlanǵan is-sharalar atqarylyp jatyr. Mal ıelerimen birlesip jaryq shaǵylystyratyn qarǵy baýlar taǵylýda. Osy rette polıtseıler Qazaqstan Respýblıkasynyń zańdaryndaǵy talaptarǵa sáıkes qandaı da bir quqyqbuzýshylyq oryn alǵan jaǵdaıda mal ıelerine jaýapkershilik qarastyrylǵanyn eskertedi», - delingen Túrkistan oblysy Polıtsııa departamentiniń baspasóz qyzmeti taratqan aqparatta.
