Tórt óńirde tas joldardyń jabylýyna baılanysty 400 adam poıyzben tasymaldandy
ASTANA. KAZINFORM — Tórt óńirde tas joldardyń jabylýyna baılanysty Ulttyq tasymaldaýshynyń poıyzdarymen shamamen 400 adam tasymaldandy. Bul týraly «Jolaýshylar tasymaly» AQ baspasóz qyzmeti habarlady.
Tas joldardyń ýaqytsha jabylýy jáne basqa kólik túrleriniń qozǵalysy shektelýi jaǵdaıynda poıyzdar eń senimdi ári qaýipsiz kólik quraly sanalady.
- Búgin Sarybel, Ekibastuz, Ereımentaý jáne Býrabaı kýrorty stantsııalarynan Ulttyq tasymaldaýshynyń poıyzdarymen shamamen 400 jolaýshy tasymaldandy, - delingen «Jolaýshylar tasymaly» AQ baspasóz qyzmetiniń habarlamasynda.
Tasymaldaý jumystary áli de jalǵasyp jatyr. Ulttyq tasymaldaýshy azamattardy qaýipsizdik sharalaryn qatań saqtap, asa qajettilik bolmaǵan jaǵdaıda uzaq saparlardan bas tartýǵa shaqyrady.
Eske sala keteıik, buǵan deıin Astana-Şýche tas jolynda 40-qa jýyq avtokólik soqtyǵysqanyn jazǵan edik. Birqatar avtojol qozǵalysy shektelgenine baılanysty ulttyq tasymaldaýshy shuǵyl sheshim qabyldady.