Tórt óńirde mefedron jasaıtyn zerthana áshkere boldy

ASTANA. KAZINFORM — ІІM jedel is-sharalardyń nátıjesinde elimizdiń tórt óńirinde sıntetıkalyq esirtki óndirýmen aınalysqan qylmystyq toptyń jolyn kesti, dep habarlaıdy Polisia.kz.

Mamyr aıynda Óskemen qalasynda jıhaz bıznesiniń atyn jamylyp, sıntetıkalyq esirtki óndirisin jolǵa qoıǵan jergilikti turǵyn ustaldy.

Ol qoımany jalǵa alyp, jabdyqtar men hımııalyq zattar ákelgen.

Ustaý kezinde 1,5 kg jýyq daıyn esirtki, bir jarym tonna prekýrsor, sondaı-aq zerthanalyq jáne býyp-túıýge arnalǵan jabdyqtar tárkilendi.

Tekserýden keıin onyń Qostanaı, Petropavl qalalary jáne Almaty oblysyndaǵy uqsas zerthanalarmen baılanysy bar ekeni anyqtaldy.

Polıtsııa qyzmetkerleri qylmyskerlerdiń qozǵalys marshrýty jáne kún tártibin baqylaýda ustady.

Osylaısha polıtseıler bir mezette birqatar óńirde operatsııa júrgizdi. Rýdnyı qalasynda jaldamaly úıdiń monshasyn zerthana etip jabdyqtaǵan eki adam ustaldy.

300 gramnan asatyn daıyn esirtki, hımııalyq zattar, qorǵanysh kostıýmder jáne jabdyqtar tárkilendi. Olardyń kóliginen satýǵa daıyn esirtki tabyldy.

Almaty oblysynda mefedron óndirisimen aınalysqan taǵy eki kúdikti ustaldy.

Óndiristiń sońǵy satysyndaǵy esirtki, prekýrsorlar jáne jabdyqtar tárkilendi.

Tergeý kezinde ustalǵandar esirtki jasyrylǵan on jerdi kórsetip, jalpy salmaǵy shamamen 3 kg asatyn esirtki anyqtaldy.

— Jalpy qala kóshelerine sıntetıkalyq esirtkiniń 11 myńǵa jýyq dozasynyń taralýyna tosqaýyl qoıyldy. Qabyldanǵan sharalardyń nátıjesinde 6 kg astam sıntetıka zańsyz aınalymǵa jiberilmedi, 4 tonnaǵa jýyq prekýrsor tárkilendi. ІІM qoǵam qaýipsizdigine beıjaı qaramaıtyn azamattarǵa alǵys bildiredi jáne quqyqtyq tártipti qamtamasyz etýdi jalǵastyratyn bolady. Birlesip qana biz qalalardy qaýipsiz etip, balalardy esirtki qaýpinen qorǵaı alamyz, — deıdi departament bastyǵy, ІІM resmı ókili Shyńǵys Alekeshev.