Tórt oblys aýmaǵyndaǵy joldar jabyldy
ASTANA. QazAqparat - Kóktemgi sý deńgeıiniń kóterilýine baılanysty elimizdiń tórt oblysy aýmaǵyndaǵy jol ýchaskelerinde kólik qoǵalysyna shekteý engizildi, dep habarlaıdy QazAqparat.
«Qazavtojol» RMK málimetine qaraǵanda, búgin tańerteńnen bastap Aqmola oblysy arqyly ótetin «Ekaterınbor-Almaty» jolynyń 915-1006 shaqyrymyndaǵy Jaqsy men Atbasar aralyǵynda (964-shi shaqyrymyn sý shaıǵan) jol jabyq.
Al Qaraǵandy oblysy aýmaǵyndaǵy «Aqshataý-Aǵadyr» avtojolynyń 90-195 shaqyrymy (166 shaqyrym +750 m. joldy sý shaıdy) aralyǵyndaǵy qozǵalys shekteldi. Aınalma jol - «Qaraǵandy-Aqsý-Aıýly-Aqadyr» arqyly.
«Qaraǵandy-Aıagóz-Buǵaz» avtojolynyń 17-217 shaqyrymyndaǵy (43,141, 169, 174, 178 shaqyrymdy sý shaıdy) Qaraǵandydan Qarqaralyǵa deıin jol jabyq tur.
Sonymen qatar «Bastaý-Aqtaý-Temirtaý» jolynyń 1-12 shaqyrymyndaǵy Bastaýdan Aqtaý kentine deıingi ýchaskede kólikterdiń jolǵa shyǵýyna tyıym salyndy.
Al Shyǵys Qazaqstan oblysynda «Semeı-Qaınar» jolynyń 8-166 shaqyrymynda (27 shaqyrymdy sý shaıǵan) qozǵalys shekteldi. Aınalma jol - «Semeı-Qaraýyl».
OQO-da sý tasqynyna baılanysty «Samara-Shymkent» avtojolynyń 2217-2235 shaqyrymy aralyǵynda (2229 shaqyrym kópir) kóliktiń barlyq túrine qozǵalys shekteldi. Arys ózeni arqyly ótetin jaǵalaý men kópir tirekterin sý shaıyp ketti. Aınalma jol - Tamerlanovka aýyly arqyly.
Qazavtojolda atap ótkendeı, sý basýy múmkin ýchaskelerde nyǵaıtý, bekitý jumystary júrip jatyr, aldyn alý belgileri qoıylyp, táýlik boıy kezekshilik uıymdastyryldy.
