Tórt qurlyqtyń toǵyzqumalaqshylary Astanada bas qosty
ASTANA. QazAqparat - Búgin Astanada toǵyzqumalaqtan ІV Álem chempıonatynyń ashylý saltanaty ótti, dep habarlaıdy QazAqparat tilshisi.
Álemniń 25 elinen 70-ten astam sportshy qatysyp jatqan álem birinshiliginiń ashylý saltanatyna Dúnıejúzilik toǵyzqumalaq federatsııasy prezıdenti Álıhan Báımenov pen QR Mádenıet jáne sport mınıstrligi Sport jáne deneshynyqtyrý isteri komıtetiniń tóraǵasy Elsııar Qanaǵatov qatysyp, sportshylarǵa jyly lebizderin bildirdi. 
Jarystyń ashylý saltanatynda sóz alǵan Álıhan Báımenov adamzat órkenıeti men ár ult mádenıetiniń qalyptasýy men damýyndaǵy zııatkerlik oıyndardyń mańyzyna toqtaldy.
«Zııatkerlik oıyndar úzdikterdi anyqtaıtyn sporttyq jarys túri ǵana emes, óskeleń urpaq tárbıesinde, ulttardyń ıntellektýaldyq áleýetin kóterýde erekshe fenomen ekenin» atap ótti Federatsııa prezıdenti.
«Júıeli jáne qısyndy oılaý, bilim men ǵylymǵa beıimdilik negizderin qalaýda, yjdahattyq pen tabandylyqty tárbıeleýde toǵyzqumalaq sekildi zııatkerlik oıyndar - erekshe utymdy ári taptyrmas tárbıe quraly», - dedi Báımenov.
Álem chempıonatynda AQSh, Antıgýa men Barbýda, Aýǵanstan, Ázerbaıjan, Germanııa, Grýzııa, Kolýmbııa, Qazaqstan, Qyrǵyzstan, Qytaı, Mońǵolııa, Ózbekstan, Reseı, Sırııa, Tájikstan, Túrkııa, Túrkmenstan, Úndistan, Ulybrıtanııa, Chehııa, Shveıtsarııa sııaqty memleketterden sportshylar qatysýda.
Bulardyń ishinde Avstrııa, Kamerýn, Polsha jáne Ýkraına sportshylary tuńǵysh ret toǵyzqumalaqtan álemdik arenada sheberlikterin kórsetpek.
Chempıonat erler jáne áıelder arasynda jeke-jeke klassıka, rapıd, blıts boıynsha ótýde. Alǵash ret toǵyzqumalaqtan juptyq komandalyq jarys bolady. Oǵan ár memleketten 1 er, 1 áıel adam qatysýda. Ár eldiń quramasy 2 er jáne 2 áıelden turady.
Álem birinshiliginiń basty maqsaty - qazaqtyń ulttyq zııatkerlik oıynyn álemdik deńgeıde nasıhattaý, onyń buqaralyq sıpatyn arttyrý jáne osy sport túrindegi eń úzdik sportshylardy anyqtaý maqsatynda ótkizilýde.
Toǵyzqumalaqtan tuńǵysh álem chempıonaty 2010 jyly Astana qalasynda ótkizilip, 16 elden sportshylar qatysqan bolatyn. 2012 jyly Chehııanyń Pardýbıtse qalasynda bolǵan ІІ Álem chempıonatyna 10 elden sportshy qatyssa, ІІІ Álem chempıonaty 2015 jyly Almatyda ótkizilip, 23 eldiń sportshylary baq synady.
Toǵyzqumalaq London (2006), Pardýbıtse (2007), Kann (2009) dúnıejúzilik zııatkerlik festıvalder men olımpıadalardyń baǵdarlamasyna engizilgen. Ulttyq oıynnan halyqaralyq jarystar Antıgýa men Barbýda, Germanııa, Qazaqstan, Qyrǵyzstan, Monǵolııa, Ózbekstan, Reseı, Túrkııa, Ulybrıtanııa, Chehııa, Shveıtsarııa jáne taǵy basqa memleketterde ótkizildi.
2009 jyldyń 15 qyrkúıeginen bastap, toǵyzqumalaq álemdik ǵalamtorda www.iggamecenter.com - saıtynda zııatkerlik oıyn retinde tirkelip, onlaın júıede oınaıtyn baǵdarlamasy jasalyndy, qazir saıttaǵy oıyndar reıtıngisin bastap tur.
Aıta keteıik, birinshilik 8 qyrkúıekke deıin jalǵasady. Jarysty Dúnıejúzilik toǵyzqumalaq federatsııasy, QR Mádenıet jáne sport mınıstrligi jáne Astana qalasy ákimdigi uıymdastyrýda.
