Tórt kúnde Astanada 45 myń tekshe metr sý sorylyp alyndy
ASTANA. QazAqparat - Jaýyn-shashynnyń kóp túsýine baılanysty Astana qalasynyń TJ departamenti men komýnaldyq qyzmetter kúsheıtilgen rejımde qyzmet etýdi jalǵastyrýda. Tolassyz jańbyr Astana qalasynda birneshe táýlik boıy jaýyp keledi. Ylǵaldylyqtyń joǵary bolýynan jaýyn sýlary sińbeı, saldarynan sýdyń kóp mólsheri jer betinde qalyp qoıýda.
Osy kúnderi jaýyn-shashyn mólsheri bir aılyq normadan asyp ketken, qalanyń birneshe kóshesi men úılerin sý alyp, bul jerlerde táýlik boıy sýdy sorý jumystary júrgizilýde. Tórt kúnniń ishinde (mamyrdyń 16-21 aralyǵynda) Astana qalasynda 45 myń tekshe metr sý sorylyp alynǵan.
20 mamyr jaǵdaıyndaǵy derekter boıynsha kóshe men úılerdi jer asty sýynan aryltý boıynsha qońyraýlar túsken, naqtylaı tússek: «Almaty» aýdanynan - 140, «Saryarqa» aýdanynan -225, «Esil» aýdanynan - 22 ótinish. Barlyq ótinishter boıynsha jumystar júrgizilýde.
Mamyrdyń 20-y kúni 11 591 myń tekshe metr sý tazartylǵan. Búgingi kúni qala kóshelerinde 215-ke jýyq arnaıy tehnıka jumys isteýde. Sınoptıkterdiń boljamynsha, jaýyn-shashyndy aýa-raıy Astana qalasynda apta sońyna deıin saqtalmaq.
Sý alǵan aýdandarda Astana qalasy TJ departamentiniń, «Astana Tazalyq» JShS men aýdannyń merdiger mekemeleriniń kúshteri men qurylymdary jumys isteýde.
Jaýyn-shashynnyń kóp túsýine baılanysty 17, 18, 19, 20 mamyr kúnderi «Zapadnyı», «Gazmashapparatýry» saıajaılyq odaqtaryndaǵy úılerdi sý alýdan saqtaý maqsatynda Esil ózeni arnasynyń boıymen eki jerden qorǵanys ornatyldy. 4 kúnniń ishinde «ÓS jáne AQJQ» MM kúshimen 14 872 m3 sý sorylyp alyndy, 3450 qum toly qap qoıylyp, jeke quramnan 65 adam jáne 12 tehnıka jumyldyryldy.
Astana sý qoımasyndaǵy sýdyń kólemi 409 mln. m3-ty quraıdy. Sońǵy táýlikterde kelgen sýdyń kólemi - 1.5 mln.m³. Astana qalasynyń jobalyq dambasynyń kólemi 450 mln.m3, búgingi kúni sý qoımasynyń naqty kólemi 138,9 mln.m3 quraıdy.
