Tórt kúnde 2 myń shaqyrymnan astam temir jol qardan tazartyldy
ASTANA. QazAqparat - Sońǵy tórt kún ishinde, ıaǵnı 18 men 21 qańtar aralyǵynda aýa raıynyń kúrt buzylýyna baılanysty shyǵys óńiriniń barlyq stantsııalarynda joldy qardan tazartý jumystary táýlik boıy júrgizildi. Bul týraly «Qazaqstan temir jolynyń» baspasóz qyzmetine silteme jasap, QazAqparat habarlaıdy.
Jumysqa shamamen 300 temirjolshy tartyldy. Stansalarda jol sharýashylyǵy qyzmetkerleri, qar burqasyny kezinde baǵyttamaly burmalardyń jaǵdaıyna jaýaptylar táýlik boıy kezekshilik etti.
«Qar tazartý jumystaryna 44 dana qar tazalaý jáne qar arshý tehnıkasy jumyldyrylsa, bul rette 2,5 myń shaqyrym jol qardan arshylyp, 10 000 tekshe metr qar shyǵaryldy. Jol dıstantsııasy qyzmetkerleri kúsh-jigeriniń arqasynda poıyzdar qozǵalysynyń kestesi buzylǵan joq» delingen habarlamada.
Aýa raıynyń kúrdeli jaǵdaıy men qardyń uıytqýy jóninde eskertilip, poıyzdardy qaýipsiz jáne úzdiksiz ótkizýdi qamtamasyz etý úshin kún saıyn naqty sharalar qabyldanyp otyr.
