Tórt kún toıǵa baryp edim - koronavırýspen aýyrǵan jambyldyq ókinishin bildirdi
TARAZ. QazAqparat – Jambyl oblysynda ókpesi 76 paıyz qabynǵan, eki apta boıy jasandy jeldetý apparatymen dem alǵan, kúrdeli jaǵdaıdaǵy naýqas emdelip shyqty, dep habarlaıdy QazAqparat tilshisi.
65 jastaǵy Jambyl aýdanynyń turǵyny shilde aıynyń ortasynda Jambyl oblystyq kópbeıindi aýrýhanasynyń juqpaly aýrýlar qurylymyna túsken.
Aýrýhanaǵa túsken kezdegi jaǵdaıy tym aýyr edi. Oǵan qosa naýqasta qant dıabeti, arterıaldy gıpertenzııa, tynys alý jetispeýshiliginiń І-dárejesimen qatar ıntoksıkatsııalyq sındromnyń bolýyna baılanysty jansaqtaý bóliminde baqylaýda boldy. Túsken kúnnen bastap, tynys alý jetispeýshiligi ІІ,ІІІ-dárejege deıin tómendep, jasandy tynys alý apparatyna qosylǵan.
Der kezinde júrgizilgen keshendi emniń arqasynda patsıenttiń jaǵdaıy jaqsarǵan. Naýqastyń ómirin aman alyp qalý úshin dárigerler ony eki apta boıy úzdiksiz baqylaýda ustap, tıisti em-sharalar retin júrgizip otyrdy. Degenmen, qosalqy aýrýlary bolǵandyqtan, áreń ózine kelgen ana tıisti medıtsınalyq sharalar nátıjesin bergen soń esin jıyp, ózdiginen dem alýǵa kóshti.
«Jaz mezgili toı mezgili demekshi, 4 kún qatarynan uıat bolmasyn dep barǵan edim. Besinshi kúni dene qyzýym kóterilip, álsizdik boıymdy basyp aldy. Býyndarym aýyra bastady. El saldyryp jatqan vaktsınany da alǵan joq edim. Úıden dáriler iship, ýkoldar qabyldadym. Ózdiginen júrgizilgen emnen jaǵdaıym jaqsarmaǵan soń, jedel járdem shaqyrdym. Osylaısha aýrýym odan saıyn asqynyp, jansaqtaý bóliminen bir-aq shyqtym. Munda kelgende eki jaqty pnevmonııa, ókpeniń 76% qabynýy degen dıagnoz qoıyldy. Eki jeti ókpeni jasandy jeldetý apparatyna qosýly jattym. Dárigerlerdiń kúsh-jigeriniń nátıjesinde qaýipti vırýstan aman qaldym. Meni beıindi bólimsheniń palatasyna aýystyrdy, onda emdeýdi jalǵastyrdym. Barsha aq halattylarǵa alǵysymdy bildiremin», - dep, aýrýhanadan shyǵarda aǵynan jaryldy.
