Tórt qytaılyq stýdent AQSh úkimetin sotqa berdi

ASTANA. KAZINFORM — AQSh-taǵy tórt qytaılyq stýdent Donald Tramp ákimshiligin sotqa berdi. Olar AQSh úkimetiniń sheteldik stýdentterge qatysty vızany jappaı joıý áreketin zańsyz dep tanyp, ony toqtatýdy jáne stýdenttik mártebeni qalpyna keltirýdi talap etip otyr. Bul týraly Lianhe Zaobao basylymy habarlady. 

Osy aptada Kalıfornııa ýnıversıteti (Berklı), Karnegı-Mellon ýnıversıteti jáne basqa da bedeldi oqý oryndarynda oqıtyn tórt qytaılyq stýdent Kalıfornııanyń federaldyq okrýgtik sotyna shaǵym túsirdi.

Olardyń málimdeýinshe, AQSh bıligi «ulttyq qaýipsizdik» degen naqty emes sebeppen júzdegen stýdenttiń vızasyn joıyp, bul týraly ne stýdentterge, ne ýnıversıtetterge eskertpegen. Vıza joıylǵan stýdentterdiń kópshiligi Qytaıdan kelgen.

Advokat Jý Kelıannyń aıtýynsha, AQSh memlekettik departamenti 2024 jyly 88 oqý ornynan keminde 529 stýdent pen zertteýshiniń vızasyn joıǵan. Jý Kelıannyń ózi buǵan deıin de Tramp ákimshiligine qarsy birqatar isterge qatysyp, 2020 jyly WeChat qoldanýǵa tyıym salýdy toqtatqan is boıynsha jeńiske jetken.

Shaǵymda AQSh úkimeti Konstıtýtsııany jáne ákimshilik is júrgizý erejelerin buzdy dep kórsetilgen. Óıtkeni stýdentterge eshqandaı eskertý, tyńdalym nemese resmı dálelder usynylmaǵan. Keıbir jaǵdaılarda kóshi-qon organdary birneshe jyl burynǵy jol erejesin buzý nemese turmystyq daý negizinde vızany joıǵan.

Advokattyń aıtýynsha, bul áreketter tek zańsyz ǵana emes, sonymen qatar qytaılyq stýdentterge qatysty kemsitýshilik sıpatta jasalǵan.

Tórt stýdent sottan ýaqytsha toqtatý týraly buıryq (TRO) shyǵarýdy surady. Eger sot bul ótinishti qanaǵattandyrsa, joıylǵan vızalardyń kúshin ýaqytsha qalpyna keltirý múmkin bolady.

Aıta keteıik, sońǵy aılarda AQSh-ta halyqaralyq stýdentterdiń SEVIS tirkeýi jappaı joıylyp jatyr, bul olardyń zańdy mártebesin joǵaltýyna alyp keledi. Eger olar elden shyqpasa, bolashaqta jańa vıza alý qıynǵa soǵýy múmkin.

Jaqynda osyndaı jaǵdaıǵa ushyraǵan Dartmýt kolledjiniń doktoranty Lıý Sıaotıan da sotqa júginip, vızasyn ýaqytsha qalpyna keltirýge qol jetkizdi.

Buǵan deıin AQSh-ta shetel azamattaryna qandaı vızalar beriletinin jazǵan bolatynbyz.