Tórt qazaqstandyq ánshi «Operalııa-2017» baıqaýyna qatysady
ASTANA. QazAqparat - Álemge tanymal opera ánshisi jáne dırıjer Plasıdo Domıngo negizin qalaǵan bedeldi «Operalııa» baıqaýyna tórt qazaqstandyq ártis qatysady, dep habarlaıdy «QazAqparat» HAA tilshisi.
Jıyrma besinshi ret uıymdastyrylǵaly otyrǵan Opera óneriniń dúnıejúzilik konkýrsy 2017 jyldyń 24 - 29 shildesi kúnderi «Astana Opera» sahnasynda ótkiziledi.
Atap ótken jón, ataqty «Operalııa» baıqaýy jyl saıyn álemniń eń áıgili alańdarynda ótkizilip keledi. Olardyń qatarynda - ańyzǵa aınalǵan mılandyq La Skala, Londondaǵy «Kovent-Garden», Koroldik teatr (Madrıd, Ispanııa), Fılarmonıko teatry (Verona q., Italııa) bar. Al bıyl «Operalııa» baıqaýynyń jıyrma besinshi mereıtoılyq maýsymy Qazaqstanda alǵash ret ótkeli otyr.
Baıqaýdyń vıtse-prezıdenti, Plasıdo Domıngonyń uly Alvaro Domıngo jýrnalıster suraǵyna jaýap bere otyryp, «Astana Opera» teatrynda baıqaýdy ótkizýge barlyq jaǵdaı jasalǵanyn erekshe atap ótti.
«Operalııa baıqaýy jyl saıyn álemniń túrli teatrlarynan shaqyrtý alady. Bıyl Ońtústik Koreıanyń Seýl qalasynan, Japonııadan, Portýgalııadan jáne Qazaqstannan usynystar kelip tústi. Shaqyrtýlardy qaraǵanda, EKSPO-dan bólek, Astananyń sońǵy úlgidegi tehnıkamen jabdyqtalǵan zamanaýı teatryna jáne qyzmetkerlerdiń jumysqa degen ynta-yqylasyna nazar aýdardyq. Júrgizilgen kelissózder nátıjesi eki taraptyń da kóńilinen shyǵyp, «Astana Opera» teatryn tańdadyq», - dedi kishi Domıngo.
Aıtýly saıysqa álemniń 17 elinen eń daryndy 40 qatysýshy iriktelip alynady. Bıyl onda Qazaqstannyń tórt oryndaýshysy - «Astana Operanyń» jetekshi solısi, halyqaralyq baıqaýlardyń laýreaty, soprano daýysty Marııa Mýdrıak jáne Dámir Sádýaqasov (tenor), Stanıslav Lı (barıton) jáne Rasýl Jarmaǵambetov (barıton) baqtaryn synaıdy.
