Tórt qarýly adam Kaddafıdiń uly Seıf ál-Islamdy óz úıinde óltirip ketti
ASTANA. KAZINFORM — Lıvııanyń buqaralyq aqparat quraldary eldiń batysyndaǵy Zıntan qalasyna jaqyn jerde Seıf ál-Islam Kaddafıdiń tórt qarýly adamnyń qolynan qaza tapqanyn rastady. Bul týraly Euronews jazdy.
Seıf Kaddafıdiń saıası keńesshisi Abdýlla Osman Facebook paraqshasynda qysqa habarlama jarııalap, bul faktinin rastady. Alaıda ol qastandyqtyń mán-jaıy men ony jasaǵandar týraly eshqandaı málimet keltirmedi.
Seıf ál-Islam Kaddafıdiń saıası komandasy Lıvııanyń burynǵy marqum kóshbasshysynyń ulynyń qazasyna baılanysty resmı túrde kóńil aıttty.
«Qazirgi ýaqytta Seıf ál-Islamnyń máıitin elge qaıtarý máselesi uıymdastyrylyp jatyr», delingen málimdemede.
Al Hadath telearnasynyń Kaddafı áýletine jaqyn derekkózderiniń málimetinshe, ál-Islam óz rezıdentsııasynyń janyndaǵy baqta júrgen kezinde aýyr jaraqat alǵan. Shabýyl jasaǵandar tórteý bolǵan jáne olar oqıǵa ornynan dereý iz sýytyp ketken. Al Al Jazeera telearnasy qastandyq jasalar aldynda Kaddafıdiń úıindegi barlyq beınebaqylaý kameralary isten shyǵarylǵanyn habarlaıdy.
Óz kezeginde Lıvııanyń Ulttyq birlik úkimetiniń Qorǵanys mınıstrligine baǵynatyn 444-shi jaýyngerlik brıgada Kaddafıdiń úlken uly qarýly qaqtyǵystar barysynda qaza tapqanyn alǵa tartyp otyr. Alaıda brıgada jaýyngerleri bul oqıǵalarǵa qatysy baryn joqqa shyǵardy.
1972 jylǵy maýsym aıynda dúnıege kelgen Seıf ál-Islam Lıvııany uzaq jyldar basqarǵan dıktatordyń ekinshi uly bolǵan. Ol London ekonomıka mektebinde doktorlyq dárejesin qorǵap, Kaddafı rejıminiń reformatory retinde tanylǵan.
Mýammar Kaddafı 2011 jyly NATO qoldaǵan halyqtyq kóterilis nátıjesinde bılikten taıdyrylyp, 40 jyldan astam ýaqytqa sozylǵan basqarýdan keıin elde bastalǵan azamattyq soǵys barysynda qaza tapqan edi.
Al onyń uly Seıf ál-Islam 2015 jyly ólim jazasyna kesilgen. Alaıda araǵa 2 jyl salyp ol bostandyqqa shyqty.