Tórt qalada taralǵan qaýipti habarlamalarǵa TMD elderi azamattarynyń qatysy bar
ASTANA. KAZINFORM - Bıylǵy 25 qańtardan bastap Telegram messendjerinde mektepterge shabýyl jasaý qaýpi týraly anonımdi habarlamalar tarala bastady.
Habarlamalar Qazaqstannyń alty qalasynda, ıaǵnı Aqtóbede, Atyraýda, Almatyda, Pavlodarda, Qaraǵandyda jáne Qostanaıda taraǵan. Terrorızm aktisi týraly kórineý jalǵan habarlaý faktileri boıynsha sotqa deıingi tergeý bastaldy.
«Barlyq qajetti tergeý áreketteri júrgizilýde. Qazirgi ýaqytta Almaty, Aqtóbe, Atyraý jáne Pavlodar qalalarynda taralǵan habarlamalarǵa TMD elderi azamattarynyń qatysy bar ekeni anyqtaldy. Sheteldik áriptestermen olardyń qylmystyq áreketterin áshkereleý boıynsha tıisti is-sharalar júrgizilip jatyr. Alaıda tergeý múddesine baılanysty biz ázirge bul faktiler boıynsha tolyq túsinikteme bere almaımyz. Sondaı-aq Qaraǵandy jáne Qostanaı qalalarynda shabýyl jasaý qaýpi bar habarlamalardan keıin kámeletke tolmaǵandardyń Telegram-arnalaryn ashqany anyqtaldy. Olar buryn taratylǵan habarlamalardyń mátinin kóshirip, oqý oryndarynyń fotosýretterin ornalastyryp, óz mektepteriniń chattaryna jalǵan aqparat joldaǵan. Qazirgi ýaqytta Qaraǵandy qalasy № 15 orta mektebiniń jetinshi synyp oqýshysy jáne Qostanaıdaǵy № 3 mektep-gımnazııasynyń tórtinshi synyp oqýshysy anyqtaldy. Olardyń qylmystyq jaýapkershilik jasyna jetpegeni eskerilip, ata-analary bala tárbıesine kóńil bólmegenderi úshin ákimshilik jaýapqa tartyldy. Sondaı-aq sot sheshimi boıynsha olar jedel qyzmetterdi jalǵan shaqyrtýǵa jáne bilim berý obektilerin tekserýge baılanysty memleketke keltirilgen zalaldy óteıtin bolady. Shyǵyn kólemi eki mıllıon teńgege deıin jetýi múmkin», — dedi ІІM ımıdjdik jumys jáne ishki kommýnıkatsııalar departamentiniń bastyǵy Albına Mahambetova.
Terrorızm aktisine daıyndyq týraly kórineý jalǵan habarlama úshin 5 myń AEK mólsherinde, ıaǵnı 18 mln teńgeden astam aıyppul ne bolmasa 5 jylǵa bas bostandyǵynan aıyrý nemese shekteý jazasy qarastyrylady. Dúrbeleńge jol bermeý úshin polıtsııa halyq arasynda túsindirý jumystaryn júrgizedi. Bul rette oqýshylarǵa erekshe kóńil bólinedi.
«Habarlamalar jalǵan bolǵanyna qaramastan, onda kórsetilgen oryndarda qaýipsizdikti qamtamasyz etý jáne kúzetti kúsheıtý boıynsha sharalar qabyldanady. Sonymen birge arandatýshylyq jarııalanymdardy ornalastyratyn anonımdi arnalar boıynsha messendjerlerdiń ákimshiligimen jumystar júrgiziledi. Atap aıtqanda, jalǵan aqparat taratqan anonımdi arna qazirgi ýaqytta buǵattaldy. Bul jumys jalǵasatyn bolady. Ótken jyly polıtsııa terrorızm aktisi týraly kórineý jalǵan habarlama boıynsha 215 qylmystyq is qozǵady. 43 adam anyqtaldy, onyń 19-y kámeletke tolmaǵan, 7 adam sottaldy, onyń ishinde 2-ýi kámeletke tolmaǵan. Árbir osyndaı fakt boıynsha jan-jaqty tergeý júrgiziledi. Al qylmyskerlerdi anyqtaý ýaqyt enshisinde», — dedi Albına Mahambetova.
