Tórt qalada lokomotıvterge servıstik ortalyqtar salynady
ASTANA. KAZINFORM — Lokomotıvterge servıstik qyzmet kórsetýdi jergiliktendirý jáne vagon parkin jańartý jumystary jalǵasyp jatyr. Bul týraly Úkimet otyrysynda Ónerkásip jáne qurylys mınıstri Ersaıyn Naǵaspaev málim etti.
— Alstom kompanııasymen birlesip óńirlerde servıstik ınfraqurylym damytylyp jatyr. Investıtsııalyq kelisim aıasynda Astana, Almaty, Shý jáne Arys qalalarynda tórt servıstik ortalyq salý josparlanǵan. Qazirgi tańda Almaty men Shý qalalaryndaǵy ortalyqtar iske qosylǵan, al Astana men Arystaǵy nysandardyń qurylysy jalǵasyp jatyr, — dedi ol.
Mınıstrdiń málimetinshe, joba nátıjesinde 700 jańa jumys orny ashylyp, lokomotıvterge tolyq tsıkl boıynsha tehnıkalyq qyzmet kórsetý múmkindigi qamtamasyz etiledi.
Sonymen qatar mınıstr vagon parkiniń tozý deńgeıi áli de joǵary ekenin atap ótti.
— Búginde júk vagondary parkiniń tozýy 54 paıyzdy, lokomotıvter 52 paıyzdy, al jolaýshylar vagondary 42 paıyzdy quraıdy, — dedi Ersaıyn Naǵaspaev.
Osyǵan baılanysty otandyq óndirýshilerden vagon satyp alýdy sýbsıdııalaý kólemin qaıta qaraý jáne uzaqmerzimdi offteık-kelisimsharttardy engizý usynyldy.
Buǵan deıin elimizdiń barlyq óńirindegi 124 vokzal jóndelip jatqanyn jazǵan edik.
