Tórt ǵasyrlyq qylysh tabyldy
QYZYLORDA. QazAqparat - Jýyrda osydan tórt ǵasyrdaı ýaqyt buryn Soltústik Aral tóńireginde ǵumyr keshken Óris (Shekti) balasy Aıdarbek batyrdyń jaý tóbesinde jasyndaı oınaǵan bolat qylyshy tabyldy. Bul týraly áriptesimiz Aral aýdandyq «Tolqyn» gazetiniń jýrnalısi Tolybaı Abylaev habarlady.
Buǵan sebepker bolǵan aldaǵy jyly batyr urpaqtary ataqty babasyna respýblıkalyq dárejede at shaptyryp as berý maqsatynda oblystyq ádilet organdaryna tirkelip, «Aıdarbek baba» qoǵamdyq qoryn ashqan bolatyn. Osyǵan baılanysty baba muralaryn jergilikti kónekóz qarııalar arqyly suraý salyp izdep júrgen qor músheleri Aral aýdanyndaǵy Tastúbek balyqshylar aýylyna at basyn burǵan. Osy aýyldaǵy jasy toqsanǵa taıaǵan qart ana Sábıra Ybyraıym kelini arǵy babalardan búgingi urpaǵyna aman jetken teńdesi joq bolat qylyshtyń ózi biletin tarıhy jóninde bylaı dedi:
"Men bul áýletke 1945 jyldyń 7 naýryzynda kelin bolyp tústim. Keıinirek qaıyn atam 96 jasynda bul pánıden óterde osynaý baǵa jetpes jádigeri uly Sarajat pen kelini maǵan amanat etken".
Joǵarydaǵy qoǵamdyq qor músheleri Ybyraıymovtar áýletiniń kelisimimen tórt ǵasyr saqtalǵan tarıhı qylyshty endi murajaıǵa saltanatty túrde tabys etpek.
