Tórt eldiń kúsh qurylymdary Astanada qoıan-qoltyq urysqa «tústi»
ASTANA. QazAqparat - Astana qalasynda Qazaqstan Respýblıkasy Ulttyq ulany Bas qolbasshysynyń Kýbogy úshin qoıan-qoltyq urystan halyqaralyq týrnırdiń aqtyq saıystary ótti, dep habarlaıdy QazAqparat.
Jarysqa Qazaqstannyń kúsh qurylymdarynyń sport komandalarynan bólek, Reseı Federatsııasy Ulttyq gvardııasynyń áskerleri, Qytaı Halyq Respýblıkasynyń Halyqtyq qarýly polıtsııasy, Qyrǵyzstan Respýblıkasy Ulttyq ulanynyń sport komandalary qatysty. Barlyǵy 150-ge jýyq sportshydan turatyn 15 komanda baq synady. Týrnır eki kúnge jalǵasty.
QR Ulttyq ulanynyń baspasóz qyzmetinen málim etkendeı, totamıdegi qyzý tartysta 9 salmaq dárejesi boıynsha jeńimpazdar anyqtaldy. 55 keli salmaqta QR UQK komandasynyń ókili Erǵalı Nahanov, 60 keli salmaqta birinshi oryndy QR Ulttyq ulan jaýyngeri Baýyrjan Sultanov jeńip alsa, 65 kelide qytaılyq sportshymen teń urysta «Dınamo» sport klýbynyń sportshysy Shyńǵys Janǵazy jeńisti qoldan bergen joq. 70 kelide UQK sportshysy Nazarbek Zabıev jeńiske jetti. Sondaı-aq, UQK taǵy bir ókili Bekzat Bektemisov 75 kelide qarsylas shyq keltirmedi. 80 keli salmaqta Memlekettik kúzet qyzmetiniń jaýyngeri Nursultan Bekbatshaev birinshi oryndy ıelendi. 85, 90 jáne 90 keliden astam salmaq dárejelerinde Reseı Federatsııasy Ulttyq gvardııasynyń sportshylary: Rýslan Gılıazov, Roman Kopylov jáne Salımgereı Rasýlovtardyń mysy basym boldy.
Jalpy komandalyq esepte birinshi oryndy RF Ulttyq gvardııasynyń quramasy ıelendi. Jeńimpaz komanda QR Ulttyq ulany Bas qolbasshysynyń Kýbogymen qatar 500 myń teńge aqshalaı syılyq aldy. Ekinshi oryn - QR Ulttyq ulanynyń komandasyna buıyrdy. Ulandyqtar arnaıy sertıfıkatpen qosa 300 myń teńgeni qanjyǵalaryna baılady. Úshinshi orynmen birge 200 myń teńge kólemindegi aqshalaı syıaqyny QR Memlekettik kúzet qyzmetiniń quramasy mise tutty.
QR Іshki ister mınıstri Qalmuhanbet Qasymov týrnırge qatysýshylardy jeńisterimen quttyqtap, alǵysyn bildirdi.
Sonymen qatar, shara barysynda «Rıo-2016» Olımpıada oıyndarynyń júldegeri, boksshy Vasılıı Levıtke quqyqtyq tártip áskeri jaýyngerleriniń arasynda buqaralyq sportty damytýǵa qosqan úlesi úshin «Quqyqtyq tártip áskerine - 25 jyl» keýde belgisimen marapattaldy. Marapatty Ulttyq ulan Bas qolbasshysy general-leıtenant Rýslan Jaqsylyqov tabys etti.
