«Tórt eldiń kýbogynda» Qazaqstan quramasy Ózbekstandy súrindirdi
ASTANA. 16 aqpan. QazAqparat - Astanada bokstan ótip jatqan «Tórt eldiń kýbogynda» keshe Qazaqstan Ózbekstandy utty. Al Ázerbaıjan men Ýkraına 5:5 esebimen teń tarqasty.
«Alaman» agenttiginiń jazýynsha, keshegi kezdesýdi 49 keli salmaq dárejesindegi sportshylar ázerbaıjandyq Mýnasıb Mamedov pen ýkraınalyq Nazar Kýrotchın bastady. Keshe ǵana bizdiń Birjan Jaqypovqa úlken talas ústinde ese jibergen ázerbaıjandyq oǵlan bul joly batyldaý qımyldady. Jeńis te kóp kúttirmedi. Al onyń qarsylasy týrnırde osymen ekinshi ret jeńiliske ushyrady. Budan keıingi shaıqasta da ázerbaıjan jigitiniń desi basym boldy.
52 keli salmaqtaǵy Kamran Melıkov ýkraın Aleksandr Shepelıýkti utyp, Іlııas Súleımenovten keshegi jeńilisiniń ornyn toltyrdy. Biraq budan keıingi eki salmaqta da Ýkraına boksshylary jeńiske jetip, jalpy esepti teńestirdi. Munda Oleg Prýdkıı - Samır Mamedovti (56 kg), Dmıtrıı Chernıak Shaban Shahpalangovty (60 kg) utty.
Al 64 kelige deıingi salmaqta Geıbatýlla Gadjıalıev Oleg Neklıýdovty súrindirse, kelesi salmaqta Denıs Lazarev Tamerlan Abdýllaevty (64 kg) jeńdi. Sóıtip, esep taǵy da teń jaǵdaıǵa jetti - 3:3.
Budan ary taǵy da juptasyp jeńý úrdisi qalyptasty. Endi ýkraındar osy kezdesýde birinshi ret alǵa shyqty. Ony Evgenıı Hıtrov (75 kg) pen Aleksandr Ganzýlıa (81 kg) qamtamasyz etti. Olar tıisinshe Sýltan Mıgıtınov pen Raýf Ahmedovten basym tústi. Osylaısha esep aıaq astynan qubylyp, 5:3-ke jetti.
Degenmen, sońǵy eki jekpe-jekte baryn salǵan Ázerbaıjan eliniń bylǵary qolǵap sheberleri matchty saqtap qaldy. Komandaǵa bul jetistikti Arsen Azızovti jeńgen Tımýr Mamedov (91 kg) pen Vladımır Katsýkti utqan Ashab Abdýllaev (+91 kg) alyp keldi. Osymen esep teńesti.
Al Qazaqstan men Ózbekstan arasyndaǵy kezdesýdi Birjan Jaqypov (49 kg) pen Hasanboı Dýsmatov bastady. Ókinishke oraı, bizdiń boksshy qarsylasynyń aldynda álsizdik tanytty. Odan keıingi kezdesýlerde Іlııas Súleımenov - Jasýr Latypovty (52 kg), Qaırat Erálıev - Shahrıer Isaqovty (56 kg), Berik Ábdirahmanov - Fazlıddın Gaıbnazarovty (60 kg), Mereı Aqshalov - Sanjarbek Rahmonovty (64 kg), Danııar Eleýsinov - Ýktamdjon Rahmonovty (69 kg), al Jánibek Álimhanuly Sýhrab Abdýllaevty (75 kg) tize búktirdi. Ádilbek Nııazymbetov Elshod Rasýlovty (13:9) pen Ivan Dychko Sardor Abdýllaevty (11:6) qınalmaı jeńdi. Tek Anton Pınchýk Ózbekstan chempıony Rýstam Týlıaganovtan utyldy.
Qorytyndy esep - 6:2, Qazaqstan ekinshi kezdesýinde jeńiske jetip, týrnır kestesinde kósh bastady.
Elordadaǵy «Dáýlet» sport kesheninde ótip jatqan bokstan dástúrli «Tórt eldiń týrnıri» 17 aqpan kúni Ózbekstan - Ázerbaıjan, Ýkraına - Qazaqstan sportshylary arasyndaǵy kezdesýlermen aıaqtalady.
