Tórt eldiń ǵalymdary Qanysh Sátbaevtyń fenomenin talqylamaq
ASTANA. QazAqparat - 3-4 qyrkúıek kúnderi Sátbaev qalasynda shahardyń 45 jyldyǵyna arnalǵan mereıtoılyq sharalar ótedi. Onyń aıasynda «Q.I.Sátbaev - Tulǵa. Patrıot. Ǵalym» atty halyqaralyq sımpozıým uıymdastyrý josparlanǵan, dep habarlaıdy QazAqparat Qaraǵandy oblystyq máslıhatynyń saıtyna silteme jasap.
Іs-sharanyń maqsaty - Q.I. Sátbaevtyń ǵylymı ıdeıalary men muralaryn jan-jaqty tanymal etý, sondaı-aq Eýrazııa aýmaǵynda taý-ken ónerkásibi jáne ejelgi metallýrgııa máselelerin talqylaý.
Sımpozıýmǵa Qazaqstan, Reseı, Ýkraına jáne Japonııanyń jetekshi ǵalymdary, qoǵam qaıratkerleri men zııaly qaýym ókilderi qatysady. Ǵalymdar Q.Sátbaevtyń fenomeni, onyń ǵylymǵa qosqan úlesi taqyryptaryn talqylap, qazirgi arheologııalyq jańalyqtar týraly pikirtalas uıymdastyrmaq.
Sımpozıýmnyń birinshi bólimi búgin Qaraǵandydaǵy oblystyq tarıhı-ólketaný mýzeıinde ótip jatyr. 4 qyrkúıekte sımpozıýmǵa qatysýshylar Sátbaev qalasynda jınalady.
Aǵymdaǵy jyly Sátbaev qalasyna 45 jyl tolady. Qalanyń ótkeni úlken ónerkásiptik aımaqtyń tarıhymen tyǵyz baılanysty. Qala Qanysh Sátbaevtyń esimimen atalady.
Qanysh Imantaıuly Sátbaev - ataqty geolog-ǵalym, mınerologııa ǵylymdarynyń doktory, professor, akademık, Qazaq KSR Ǵylym akademııasyn uıymdastyrýshy jáne onyń tuńǵysh prezıdenti.
