Tórt eldiń ártisteri Qaraǵandy oblysyndaǵy DosStar festıvalinde óner kórsetti
QARAǴANDY. QazAqparat – Qaraǵandy oblysynda ótken DosStar operetta jáne mıýzıkl festıvalinde Qazaqstan, Reseı, Germanııa jáne Serbııa ártisteri óner kórsetti, dep habarlaıdy QazAqparat.
Aımaq ákimdiginiń aqparatyna sáıkes, festıval 25 qazanda Temirtaý Mádenıet úıinde bastaldy. Munda kórermender nazaryna Omby memlekettik mýzyka teatrynyń «Jasyryn mahabbat» qoıylymy usynyldy. 26 qazanda Serbııa ulttyq teatrynyń jetekshi opera solısti Branıslav ıAtıch qaraǵandylyq ártisterge vokal boıynsha sheberlik sabaǵyn ótkizdi. Bul, onyń Qazaqstanǵa alǵashqy sapary emes. Opera ánshisi buǵan deıin Almaty men Nur-Sultanda sheberlik sabaqtaryn ótkizip, óz ónerin kórsetken. «Birneshe jyl buryn Almatyda úlken jáne mańyzdy sheberlik sabaǵyn ótkizdim. Stýdenttermen jumys jasadym, sondyqtan «mańyzdy» dep otyrmyn. Olardy oqytý, olarǵa kóbirek bilim berý kerek boldy. Al, munda kásibı mamandarmen jumys jasadym, olarmen ońaıyraq. Menińshe, bul tolyqqandy oqýǵa qaraǵanda, kóbine tájirıbelik keńeske uqsas», - deıdi ol. Al germanııalyq metstso-soprano Sıýzanna Haıntsmann Qazaqstanǵa alǵash ret kelgen. Ol Eýropadan tys teatrlardyń qalaı jumys isteıtinin kórgisi kelgendikten, festıvalge shaqyrýdy qabyl alǵan.
«Birinshi baıqaǵanym, Qaraǵandyda barlyǵy óte meıirimdi, barlyǵy kómektesýge daıyn turady. Olar meni jyly qabyldady. Men basqa elderdiń ártisterimen aldaǵy birlesken qoıylymdarǵa qatysty qatty qobaljydym, biraq bári meni jubatty. Men munda naǵyz óz isiniń mamandary jumys isteıtinine kóz jetkizdim», - dedi ártis. 26 qazanda festıval aıasynda Temirtaý Mádenıet úıiniń sahnasynda elordalyq «Jastar teatry» «Jibek» spektaklin qoıdy.
Festıvaldiń sońǵy kúni - 27 qazanda Qaraǵandy Mýzykalyq komedııa teatrynyń sahnasynda barlyq qonaqtardyń qatysýymen gala-kontsert ótti. Túrli elderden kelgen teatr solısterin tyńdaýǵa kelgen jurt qarasy kóp boldy. Alǵashqy DosStar festıvali Qaraǵandyda 2012 jyly Qaraǵandy Mýzykalyq komedııa teatrynyń bastamasymen ótti. Keıin sharany jyl saıyn ótkizý uıǵaryldy. Sodan beri oǵan Belarýs, Qyrǵyzstan, Ázerbaıjan, Latvııa, Lıtva, Grýzııa, Armenııa, Moldova, Polsha jáne basqa da 17 elden 500-den astam ártis qatysty.
