Tórt el Eýropaǵa taza energııa jetkizý úshin kúsh biriktiredi
ASTANA. KAZINFORM — Túrkııa, Ázerbaıjan, Bolgarııa jáne Grýzııa taza energetıka salasyndaǵy strategııalyq seriktestik týraly kelisimge qol qoıdy. Qujat Eýropa naryǵyna elektr energııasyn jetkizýdiń jańa baǵytyn damytýdy kózdeıdi, dep habarlaıdy Anadolu.
Bul kelisim Túrkııanyń Antalıa qalasynda ótken COP31 klımat konferentsııasy aıasynda jasaldy. Qujatqa tórt eldiń energetıka vedomstvolarynyń ókilderi qol qoıdy.
Joba jańartylatyn jáne basqa da taza energııa kózderinen óndirilgen elektr qýatyn Ázerbaıjan – Grýzııa – Túrkııa – Bolgarııa baǵytymen tasymaldap, odan ári Eýropa naryǵyna jetkizýge múmkindik beredi.
Atalǵan elder elektr energııasyn shekaraaralyq jeliler arqyly jetkizýdi damytyp, ony satý tetikterin jetildirýge jáne úzdiksiz jetkizýdi qamtamasyz etý úshin tehnıkalyq ári normatıvtik talaptardy úılestirýge nıetti.
Budan bólek energetıka salasynda talshyqty-optıkalyq ınfraqurylym qurý jáne derekterdi berý júıelerin damytý baǵytynda da yntymaqtastyq ornatý josparlanǵan.
Túrkııanyń energetıka mınıstri Alparslan Baıraktardyń aıtýynsha, jańa áriptestik 2024 jyly bastalǵan energetıkalyq yntymaqtastyqtyń jalǵasy sanalady. Al 2025 jylǵy sáýirde Bakýde qol qoıylǵan memorandým osy baılanysty bekite tústi.
Kelisimniń júzege asýy taza elektr energııasynyń saýdasyn keńeıtip, energııa kózderin ártaraptandyrýǵa jáne óńirdiń energetıkalyq qaýipsizdigin nyǵaıtýǵa yqpal etedi.
Buǵan deıin Túrkııa BUU-nyń COP31 klımattyq konferentsııasyn alǵash ret ótkizip otyrǵanyn habarlaǵan bolatynbyz.
