Tórt balany órtten qutqarǵan oqýshy kólik minip, Prezıdentten alǵys aldy

QOSTANAI. QazAqparat — Prezıdent quttyqtaýynyń mátinin Qostanaı oblysynyń ákimi Arhımed Muhambetov órt kezinde tórt balany qutqarǵan Oleg Pırogpen kezdesý kezinde oqyp berdi, dep habarlaıdy QazAqparat tilshisi oblys ákiminiń baspasóz qyzmetine silteme jasap.

Memleket basshysy Qasym-Jomart Toqaev «Sadovod» saıajaıynyń aýmaǵynda órt kezinde balalardy qutqaryp qalǵan Qostanaı qalasyndaǵy №22 orta mektep oqýshysy Oleg Pırogtyń erligi men batyrlyǵyna alǵys aıtty.

«Osyndaı jasta naǵyz erlik jasadyń, esh oılanbastan balalarǵa kómekke kelip, úlken qaıǵynyń aldyn aldyń», - dep jazdy Memleket basshysy.

Qasym-Jomart Toqaev Olegtiń batyrlyq áreketi - rýhynyń beriktigi, beı-jaı qaramaǵany jáne patrıotızm kórinisi ekenin atap ótti.

Sonymen qatar, Oleg Pırog QR Tótenshe jaǵdaılar mınıstrliginiń «Órtte kórsetken qaısarlyǵy úshin» medalimen, al Valentına Pırog QR TJM Alǵys hatymen marapattaldy.

«Allur» kompanııalar toby Memleket basyshysynyń úndeýin qoldap, jas batyrǵa otandyq óndiristegi Chevrolet Nexia avtokóliginiń kiltin tabys etti.

«Bizdiń Prezıdent qazaqstandyqtardyń osyndaı batyrlyq áreketin nazardan tys qaldyrmaıdy jáne únemi baǵalaıdy. «Allur» kompanııasy Memleket basshysy - Qasym-Jomart Toqaevtyń úndeýin tolyqtaı qoldaıdy. Qazaq jeri árdaıym uly batyrlarmen dańqqa bólenip kelgen, jáne bul jas balanyń istegen isi – naǵyz erlik, tańdanýǵa turarlyq jáne bárimizge úlgi!», - dedi «Allur» KT» AQ dırektorlar keńesiniń tóraǵasy Andreı Lavrentev.

Andreı Lavrentev bul syılyqtyń Oleg Pırogtyń batyrlyq áreketin joǵary baǵalaǵan kásiporynnyń barlyq qyzmetkerleri atynan ekenin atap ótti.

Esterińizge sala keteıik, Qostanaıda «Sadovod» saıajaıynda 5-synyp oqýshysy Oleg Pırog tórt balany órtten aman alyp qalǵan bolatyn.

Qostanaı oblysynyń ákimi Arhımed Muhambetov balalardy órtten aman alyp qalǵan Oleg Pırogovpen kezdesip, marapattaǵan edi.

Órtten zardap shekken kópbalaly otbasyna páterdiń kiltin tabystady.