Tórt balany qutqarǵan órt sóndirýshiler marapattaldy - Qaraǵandy
QARAǴANDY. QazAqparat – Qaraǵandy oblysy TJD Órt sóndirý jáne avarııalyq-qutqarý jumystary qyzmetiniń №10 órt sóndirý bóliminiń bólimshe komandıri jáne órt sóndirýshi-qutqarýshysy azamattyq qorǵaý serjanty Hasenov Narbota men Tóleýhanov Áset jańa Qazaqstandyq qoǵam qurý isindegi tabysty eńbegi jáne oblystyń qoǵamdyq-saıası ómirine belsendi qatysqany úshin Qaraǵandy oblysy ákiminiń Alǵys hatymen marapattaldy,dep habarlaıdy QazAqparat tilshisi.
Narbota Hasenov pen Áset Tóleýhanov azamattyq qorǵaý organdarynda bes jyldan artyq qyzmet etedi.
Qyzmet etý kezeńinde olar ózderin jaqsy qyzmetkerler retinde kórsetti.
Olardyń jumysynyń mysaly retinde 2020 jyldyń 25 qarashanyń túninde Qaraǵandy qalasy Lobody kóshesinde bolǵan órtti aıtýǵa bolady.
Qutqarýshylar oqıǵa ornyna kelgende 5 qabattaǵy páterdegi órt pen podezden shyqqan qatty tútindi kóredi.
«Barlaý jáne qajet bolǵan jaǵdaıda qutqarý jumystaryn júrgizý mindetin alǵan Narbota Hasenov pen Áset Tóleýhanov páterlerdi tekserýge kirisedi.
Jaýyngerler eki páterdiń esiginiń syrtynda kómek suraǵan balalardyń daýystaryn estıdi. Órt sóndirýshi-qutqarýshylar dereý esikti ashýǵa kiristi, odan keıin 6 jastan 12 jasqa deıingi tórt balany tabady. Narbota Hasenov bastaǵan gaz-tútinnen qorǵaý qyzmetiniń býyny dereý óz apparattaryna qutqarý qalpaqtaryn qosyp, ony balalarǵa kıgizip, taza aýaǵa shyǵardy. №10 ÓSB bólimshe komandıri N.Q. Hasenov pen órt sóndirýshi – qutqarýshy Áset Tóleýhanovtyń saýatty, naqty is-áreketteriniń arqasynda 4 bala qutqarylyp, ýaqtyly qaýipsiz jerge kóshirildi», - dep málimdedi Qaraǵandy oblysynyń TJD baspasóz qyzmeti.
