Tórt balama 101 myń teńge aldym - kópbalaly ana

NUR-SULTAN. QazAqparat - Tórt balany jalǵyz ózi asyrap otyrǵan Maral Boranbaeva jańa formattaǵy ataýly áleýmettik kómekpen úıge kiris pen birge yrys ta kelgenin aıtady, dep habarlaıdy QazAqparat tilshisi.

Maral Boranbaevanyń eń kishi balasy múmkindigi shekteýli jan retinde tirkelgen. Úıdegi 4 balanyń eń úlkeni 19-da. Ekinshisi 2002 jyly týsa, úshinshisi 2008 jyly dúnıege kelgen.

«Jańa formattaǵy áleýmettik kómektiń alǵashqy tólemin aldyq. 101 400 teńge shyǵypty. Buǵan deıin múgedek balanyń asyraýshysy retinde járdemaqy alatynbyz. Ol múlde jetpeıtin. Em-domy bar, ortopedııalyq aıaq kıimin alý kerek. Jazǵy aıaqkıiminiń ózi 25 myń teńge turady. Úlken ulymnyń aıaq kıimi de tozyp júrgen. Jańa formattaǵy áleýmettik kómek qolymyzǵa túsken sonyń bárin jańaladyq. Kirispen birge úıimizge yrys ta kirgendeı» - deıdi elordalyq ana.

Qazir ol 4 balasymen birge tolymsyz otbasy retinde berilgen arendalyq baspanada turyp jatyr.

«Aı saıyn bes myń teńge tóleýimiz kerek. Qaryzdan erterek qutylý úshin odan kóbirek tóleýge tyrysyp júrmin» - deıdi Maral Boranbaeva.