Tórt aıý shokoladtan ýlanyp óldi
ASTANA. QazAqparat - Amerıkalyq Nıý-Gempshır shtatynda ańshylar jem retinde shokoladty paıdalanǵandyqtan 4 aıý óldi. Bul týraly amerıkalyq BAQ habarlady.
Ótken jyldyń qyrkúıek aıynda ańshylar 45 keli shokolad pen bálishti jem retinde qoıǵan aýmaqtan birneshe metr jerde eki aıý men eki qonjyqtyń óli denesin tabyldy.
Nıý-Gempshır Ýnıversıtetiniń qyzmetkerleri arnaıy zertteý júrgizip, aıýlar júrektiń toqtaýynan ólgenin anyqtaǵan. Oǵan kakao quramynda bolatyn teobromın zatynyń kóp mólsherde paıdalanylǵany sebep bolǵan.
Shtattyń ań aýlaý jáne balyq aýlaý departamentiniń ókilderi osyǵan baılanysty jem retinde shokoladty paıdalanýǵa tyıym salatyn zańnyń qabyldanýyn suraıtynyn málim etti.
2014 jyldyń ań aýlaý maýsymynda Nıý-Gempshırde 784 qara aıý óltirildi. Shtatta shamamen 4,8 myń aıý mekendeıdi eken.
