Tórt aıda elimizde órtten 146 adam qaıtys bolǵan
ASTANA. QazAqparat – Tótenshe jaǵdaılar jyldyń tórt aıynda respýblıka boıynsha tirkelgen tabıǵı jáne tehnogendik sıpattaǵy tótenshe jaǵdaılar týraly sholý jarııalady, dep habarlaıdy QazAqparat.
Sholýdaǵy derekkke súıensek, jyl basynan beri «112» pýltine halyqtan 2 102 612 qońyraý kelip túsken.
3 875 tabıǵı jáne tehnogendik sıpattaǵy tótenshe jaǵdaı men oqıǵa tirkelip, 486 adam zardap shekken. Sonyń ishinde 151 adam qaza bolyp, 1 mlrd 272,75 mln teńgege materıaldyq nuqsan kelgen.
Tehnogendik sıpattaǵy tótenshe jaǵdaılardan 185 adam qaza bolǵan. Tehnogendik sıpattaǵy jaǵdaılardyń basym bóligi (85,7%) óndiristik jáne turmystyq órtten bolǵan. Tórt aıda 3 133 órt bolyp, 146 adam qaza bolǵan. 1 mlrd 208,33 mln teńgege materıaldyq nuqsan kelgen.
Órt Batys Qazaqstanda 48,6%, Qostanaı oblysynda 44,4%, Jambyl oblysynda 42%, Atyraý oblysynda 39,7%, Abaı oblysynda 39,6%, Ulytaý oblysynda 36,8%, Aqtóbe oblysynda 23,1%, Almaty oblysynda 24,3%, Jetisý óńirinde 24%,Qyzylorda oblysynda 14% kóbeıgen.
[
