Tórt aıda alǵash ret munaı baǵasynyń barreli 66 dollarǵa deıin kóterildi

ASTANA. QazAqparat - WTI maýsymdyq fıýcherster baǵasy barreline 58,77 dollarǵa jetti, al bazalyq soltústik-teńizdik Brent munaıy barreline 66,20 dollarǵa kóterildi, dep habarlady RBK.

Kýshıng, Oklahoma termınalynda WTI munaıynyń kólemi bir aptada 514 myń barrelge tómendegen, dep habarlady Bloomberg AQSh Energııa mınıstrligine silteme jasap. Bul rette eldegi qordyń jalpy deńgeıi boljanǵan deńgeıden tómen. Amerıkandyq bıliktiń derekterine súıensek, sońǵy aptada munaı qoımasyna 1,9 mln barr. quıyldy. Qordyń jalpy kólemi 490,9 mln-ǵa deıin ulǵaıdy. Bul 1982 jylǵy tamyzda aqparat jınaýdy bastaǵan sátten bastap aptalyq eń kóp deńgeı. Alaıda taldaýshylar 3,3 mln barrel ósimin kútken.

Agenttik eger baǵanyń ósýin sezingen munaı óndirýshiler jyldam qarqynmen óndirýdi ulǵaıtsa, jaǵdaıdyń jaqsarýy ótkinshi bolatynyn atap ótedi. AQSh-ta munaı óndirý 1930 jyldardan bastap eń kóp deńgeıde saqtalýda. Músheleri álemdegi munaıdyń 40 paıyzyn naryqqa jetkizetin OPEK óndirý deńgeıin tómendetýden ázirge bas tartýda. 12 jáne 13 mamyrda Reseı, Meksıka, Omannyń tehnıkalyq mamandary OPEK-tegi áriptesterimen osy máseleni talqyǵa salmaq, dep habarlady Bloomberg. Seısenbide, 28 sáýirde, Reseı energetıka mınıstri Aleksandr Novak 5 maýsymǵa belgilengen karteldiń josparly májilisiniń aldynda OPEK ókilderimen kezdesetinin málimdedi. «2-3 maýsymda kezdesemin», - dedi ol jýrnalısterge. Commerzbank baǵalaýynsha, kartel músheleri basqa munaı óndirýshi eldermen óndirýdi birlesip tómendetýdi ýaǵdalasý múmkindigi shekteýli.