Tórt aı ishinde Qazaqstannan shetelge 170 mlrd teńge aýdarylǵan
NUR-SULTAN. QazAqparat - Qazaqstannan aýdarylatyn aqshanyń úshten eki bóligi Reseıge, Ózbekstan men Túrkııaǵa ketip jatyr, dep habarlaıdy QazAqparat ranking.kz silteme jasap.
«2019 jyldyń qańtar men sáýir aılarynyń qorytyndysy boıynsha Qazaqstannan shetelge 172,8 mlrd teńge aýdarylǵan. Bul 2018 jyldyń tıisti kórsetkishinen qaraǵanda 8,6 paıyzǵa artyq. Sonymen birge, tranzaktsııa sany da 1 paıyzǵa azaıyp, 775,8 myńdy kórsetken», - delingen ranking málimetinde.
Aqshanyń basym bóligi halyqaralyq aqsha aýdarymdar júıesi arqyly Reseıge jóneltilgen (65,1 mlrd teńge). Bul - 2018 jyldyń 4 aıynyń kórsetkishinen 6,4 paıyzǵa az.
Ekinshi orynda Ózbekstan tur. Ol jaqqa aýdarylǵan aqshanyń mólsheri 26,5 mlrd teńgemen bir jyldyń ishinde 36,2 paıyzdyq ósimge jetken. Alǵashqy úshtikti Túrkııa túıindeıdi (25,8 mlrd teńge, +41,2 paıyz).
