Tórt atasynan beri shańǵy jasaıtyn Altaı qazaǵy: Shańǵy — sport túri ǵana emes, kólik quraly bolǵan
Shańǵynyń eń kóne mekeni — Altaı. Osy aımaqta turatyn qazaq halqy baıyrǵy ónerdi atadan balaǵa mura etip keledi. Sondaı kásip ıeleriniń biri 70 jastaǵy Slambek Saǵyshuly Kazinform tilshisine qar shańǵysynyń ári sport, ári kólik retindegi ereksheligi jaıly aıtyp berdi.
Slambek Saǵyshuly Altaı ǵana emes, alys-jaqyn shetelge de shańǵy jasaıtyn sheber retinde tanymal. Shańǵy tebetinder myńdaǵan shaqyrymdy artqa tastap, arnaıy kelip tapsyrys beredi.
«Baıyrǵy qar shańǵysyn jasaıtyn otbasynyń ókilimin. ıAǵnı, tórtinshi urpaǵymyn. Bul ónerdi ákemniń janynda júrip úırendim. Óz betimshe alǵashqy qar shańǵysyn 17 jasymda jasadym. Sodan beri otbasylyq kásibimizge aınaldy. Osydan 20 jyl buryn sheberhana ashtym. Munda jabdyq jasap qana qoımaı, shákirt te tárbıeleımin. Bul ata kásipti dáriptep, damytý kerek dep oılaımyn. Ózimniń eki ulym bar. Olardy da osyǵan baýlydym», — deıdi ol.
Aıtýynsha, shańǵy taza tabıǵı ónimnen ǵana jasalady. Sonysymen qundy ári erekshe.
«Jylqy terisimen qaptalǵan qar shańǵysy samyrsyn men qaıyńnan jasalady. Onyń ońaılyqpen syna qoımaıtyn myqtylyǵy osydan. Taǵy bir aıta ketetin jaıt, qar shańǵyny tek altaılyqtar ǵana jasaı alady. Onyń ólshemi adam boıynan bir qarys uzyn, eni eki eli bolady», — dep túsindirdi sheber.
Slambek Saǵyshuly Altaı — taýly, qyratty, qysy uzaq aımaq ekenin tilge tıek etti.
«Bul aımaqty mekendegen halyq úshin shańǵy — sport túri ǵana emes, qarym-qatynas quraly bolǵan. Buryndary tehnıka damymaı turǵan zamanda qalyń qar adam túgili janýarlardyń da ary-beri júrýine kedergi jasaǵan. Sondyqtan altaılyqtar shańǵyny paıdalanǵan. Qazirdiń ózinde suranys joǵary. Jylyna 50-ge jýyq shańǵyǵa tapsyrys alamyz. Quny — 1000 ıýan (68-70 myń teńge)», — deıdi sheber.
Aıta keteıik, bıyl «Bir beldeý, bir jol» qazaq-qytaı birlesken bastamasyna — 10 jyl.
Osyǵan oraı Qytaı eli Ortalyq Azııa memleketteriniń BAQ ókilderine baspasóz týryn uıymdastyrdy.
