Tórt apta qatarynan azyq-túlik baǵasy ózgerissiz qaldy

ASTANA. KAZINFORM – Senbi kúni Premer-mınıstrdiń orynbasary – Ulttyq ekonomıka mınıstri Serik Jumanǵarınniń tóraǵalyǵymen ınflıatsııaǵa áser etetin faktorlardy talqylap, ony tejeý sharalaryn ázirleýge arnalǵan keńes ótti. Bul týraly Úkimettiń baspasóz qyzmeti habarlady.

Ulttyq ekonomıka birinshi vıtse-mınıstri Azamat Ámrınniń aıtýynsha, tamyz aıynda jyldyq ınflıatsııa 12,2%-ǵa jetti (shilde aıynda – 11,8%). Baǵa ósimi ásirese Qaraǵandy (14,4%), Ulytaý (13,6%), Aqmola (13%), Atyraý (12,8%), Soltústik Qazaqstan (12,6%), Aqtóbe (12,5%) jáne Batys Qazaqstan (12,4%) oblystarynda, sondaı-aq Astana (12,8%) men Almaty (12,7%) qalalarynda baıqaldy.

– Inflıatsııaǵa eń kóp áser etkender – aqyly qyzmetter: kommýnaldyq qyzmetter (+2,9%), kólik (+1,7%) jáne densaýlyq saqtaý salasy (+0,9%), – dedi Azamat Ámrın.

Azyq-túlik emes taýarlar baǵasy orta eseppen 1%-ǵa ósti. Sonymen qatar keıbir taýarlar arzandady. Mysaly, tońazytqyshtar men muzdatqyshtar – 1,5%-ǵa, gaz plıtalary – 6,3%-ǵa, shyny buıymdar men as úı quraldary – 0,1%-ǵa tómendedi.

Azyq-túlik ınflıatsııasy qarqyny bıylǵy ekinshi toqsannan beri eki ese baıaýlap otyr. Tamyz aıynda ol nebári 0,5% boldy. Tórt apta qatarynan áleýmettik mańyzy bar azyq-túlik taýarlarynyń baǵasy ózgerissiz qalyp otyr. Bul kórsetkish jyl basynan beri alǵash ret olardyń ındeksin 7,8%-ǵa deıin tómendetýge múmkindik berdi.

Saýda jáne ıntegratsııa birinshi vıtse-mınıstri Aıjan Bıjanovanyń aıtýynsha, azyq-túlik ınflıatsııasyna ımport úlesi (azyq-túlik qurylymynda – 23–27%) aıtarlyqtaı áser etedi. Osyǵan baılanysty ımportty almastyrý baǵdarlamalary aıasyndaǵy sharalardy kúsheıtý usynyldy.

– Apta ishinde kókónister men kúrish arzandap, qant baǵasy tómendedi. Tuz ben kúnbaǵys maıy baǵasynyń ósýi baıaýlady. Bul, negizinen, óndirýshilermen jasalǵan baǵany turaqty ustaý týraly kelisimderdiń nátıjesi, – dedi Bıjanova.

Aıta keteıik, Astanada azyq-túlik taýarlarynyń assortımenti keńeıtildi.