«Tórt aǵaıyndy» soty: Urlanǵan munaı baǵasy qaıta esepteldi

Aqtóbede oblystyq qylmystyq ister jónindegi mamandandyrylǵan aýdanaralyq sotynda uıymdasqan qylmystyq topqa qatysty is áli qaralyp jatyr. Keshe Erkin Іzbasar men Qaldymurat Qartjanǵa qatysty bir epızod isten alynyp tastalǵan bolatyn. Aıyptalýshylardyń biri saýsaq izin qaldyrýǵa qarsy bolyp, biri ustaý operatsııasy kezinde bılikke baǵynbaǵan. Al búgin sotta munaıdyń quny anyqtaldy. Sarapshy sot belgilegen ýaqyt aralyǵynda munaı baǵasynyń qansha bolǵanyn tizbektep berdi.

«Qorǵaýshylardyń suraýy boıynsha Aımaqaralyq sot saraptama ortalyǵy munaıdyń ortasha baǵasyn anyqtady. Suranys boıynsha 2015 jyldyń mamyr-jeltoqsan aılary aralyǵyn, 2016 jyldyń aqpany men tamyz-qazan aılary aralyǵyn eseptep shyǵardy»,- dedi sýdıa Ahmetqalı Moldaǵalıev.

Sarapshylar shıki munaıdyń ortaq baǵasyn shyǵarý kezinde ken oryndarynyń, statıstıkalyq departamenttiń qujattaryna júgindi.

«2015 jyldyń mamyr aıynda 35036 teńge 60 tıyn, shilde 35 314 teńge 28 tıyn, tamyz 38 822 teńge 13 tıyn, qyrkúıek 39 639 teńge 32 tıyn, qazan 42 083 teńge 95 tıyn, qazan 43 516 teńge 81 tıyn, jeltoqsan 43 333 teńge bolady. Al 2016 jyldyń aqpan aıynda 28 592 teńge 59 tıyn, tamyz 42 187 teńge 30 tıyn, qyrkúıek 45 285 teńge 86 tıyn, qazan 47 453 teńge 11 tıyn dep esepteldi. Bul shıki munaıdyń bir tonnasyna eseptelgen baǵa. Biz Sınelnıkovskıı ken ornyndaǵy shyǵyndy esepteýge úshin birneshe qujattardy alyp, ortaq baǵasyn eseptep shyǵardyq. Ken ornyndaǵy munaı jeńil sanatqa jatady. Biraq bul baǵaǵa áser etpeıdi. Shıki munaı baǵasy bárine ortaq»,- dedi sarapshy Gúlmıra Moldaǵazına.

Aıta keteıik, sýdıa Ahmetqalı Moldaǵalıev ken ornynyń shyǵynyn qaıta esepteýdi jábirlenýshige tapsyrdy. Biraq jábirlenýshi ózderi eseptegen munaıdyń shyǵynyn sol kúıi is materıalynda qaldyra alady. Aıyptalýshylardyń qorǵaýshylary eger sarapshylar usynǵan baǵamen shyǵyndy qaıta eseptese, shyǵyn eki ese azaıady dep otyr.

Sot otyrysy jalǵasyp jatyr.