«Tórt aǵaıyndy» isine ІІD bastyǵy orynbasarynyń qatysy bar ma
AQTÓBE. QazAqparat - Buryn Aqtóbe oblystyq ishki ister departamenti bastyǵynyń orynbasary bolǵan sottalýshy Rahat Ahanovtyń munaı urlyǵyna qatysy bar-joǵy tekserilýde, dep habarlaıdy QazAqparat tilshisi.
Aqtóbe oblystyq qylmystyq ister jónindegi mamandandyrylǵan aýdanaralyq sotynda munaı urlyǵyna qatysty epızodtar qaralyp jatyr. Kýáger Abaı Saqtaǵanov «SNPS-Aqtóbemunaıgaz» AQ departament bastyǵynyń orynbasary bolyp jumys isteıdi. Ol sot zalynda sottalýshy Erkin Іzbasar, Saıasat Dúsipov pen Rahat Ahanovty tanydy. Kýáger ІІD bastyǵynyń orynbasary bolyp jumys istegen Rahat Ahanovpen 2013 jyldan beri tanys bolyp shyqty. Sol jyldary Aqtóbedegi munaı kompanııasyna jarylǵysh zat qoıyldy degen jalǵan aqparat tarap, qaýipsizdik qatań baqylaýǵa alyndy. Munaı kompanııasy men polıtsııa tyǵyz jumys istep, sottalýshy men kýáger jumys barysynda jıi kezdesken. Keıin Rahat Ahanov oǵan Saıasat Dúsipov baratynyn, ol kezde qabyldap, sharýasyn sheshýge kómektesýin suraıdy.
«Alǵash kezde Saıasat Dúsipov kelip, suıytylǵan gazdy qalaı alýǵa bolatynyn surady. Bul suraqty men sheshe almaıtynymdy, basshylarǵa jolyǵý qajet ekenin túsindirdim. Keıin ol maǵan telefon shalyp, kezdesý qajet ekenin aıtty. Biraq men telefon tutqasyn kótermeı júrdim. Taǵy biz kezdesýde «jigitter munaı urlap shyǵaryp jatyr eken, men de shyǵaraıyn» dep aıtty. Polıtsııa tekseretinin, kúzet kúshti ekenin eskerttim, usynystan bas tarttym. Taǵy birde jumys babymen sol kezderi ІІD bastyǵynyń orynbasary bolyp jumys istegen Rahat Ahanovqa barǵan edim. Ol «sharýalar sheshilmeı jatyr» dep aıtty. Ári sol kezdesýden soń Rahat Sovetulymen arada bolǵan áńgimeni basshylarǵa jetkizdim. Sońǵy ret Rahat Ahanov «toǵyz aı boıy basty qatyryp júrsiń» dep sýyq shyǵaryp saldy»,- dedi kýáger Abaı Saqtaǵanov.
Aıta keteıik, kýáger sot otyrysy kezinde uıymdasqan qylmystyq top jetekshisi Erkin Іzbasarmen kezdeskenin de jasyrmady. Bir ret kezdesý bolyp, sottalýshy suıytylǵan gaz shyǵarý jolyn suraǵan.
«2016 jyldyń qarasha aıynda esik aldynda jigittermen kezdesip qaldym. Olar «áńgime bar» dedi. «Adam kerek bolsa ózi kelsin» degen kezde onyń júre almaıtynyn jetkizdi. Erkin Іzbasardy tanymaımyn, birinshi ret kórdim. Sóıtip, mashınaǵa otyrdym. Ol jumyssyz júrgen balalar bar ekenin, kúzet qyzmetine sol adamdardy qyzmetke ortalastyrýǵa bolatyn, bolmaıtynyn surady. Ári suıytylǵan gazdy tasymaldaý jolyn bilgisi keldi. Suıytylǵan gazdy alý jolyn aıttym. Munaı týraly áńgime bolmady. Meni ol qorqytqan joq»,- dedi kýáger.
