Tórt aǵaıyndy isi: Urlanǵan munaı ónimi Astanaǵa jóneltilgen
Aqtóbe oblystyq qylmystyq ister jónindegi mamandandyrylǵan aýdanaralyq sotynda munaı urlyǵyna qatysty epızod qaraldy. Kýágerlerdiń biri Astanadan arnaıy kelgen. «Aq bars» JShS-niń dırektory Qaırat Quljabaev sottalýshy Saıasat Dúsipovpen tanys bolyp shyqty. 2015-2016 jyldar aralyǵynda shamamen 800 tonna oshaqqa arnalǵan janarmaı tasymaldandy. Aqtóbeden Astanaǵa avtojol arqyly jetkizilgen. Janarmaı sertıfıkaty «Lad» JShS berilgen, al munaı ónimi «Saıa-8» JShS alyndy. Sońǵysy sottalýshy Saıasat Dúsipovtyń kompanııasy bolsa, «LAD» seriktestiginde ol 8 jyl boıy jumys istegen. Sot otyrysy kezinde bir-birin kórgen kýáger men sottalýshy emen-jarqyn amandasyp, jeke arazdyǵy joq ekenin rastady.
«Munaı ónimderin kóterme-bólshektep satý-satyp alý isimen aınalysamyn. Bul jerde sottalýshy Saıasat Dúsipovty tanımyn. Ol maǵan Shýche qalasyna keldi. Sol kezde munaı ónimderin tasymaldaýǵa kelisim júrdi. 2015 - 2016 jyldar aralyǵynda 937 myń tekshe metrden astam ónim jetkizildi. Sertıfıkat boıynsha bul mazýt. Men odan artyq qujat suraǵanym joq»,- dedi kýáger Qaırat Quljabaev.
Aıta keteıik, «Tórt aǵaıyndy» isi boıynsha Qylmystyq kodekstiń munaı urlyǵy babymen 4 epızod qaralady. Búgin «SaǵyzPetroleým» JShS-niń Aşykól ken ornynan munaı urlaý isi qaraldy. Bul iske Aqtóbe oblystyq ishki ister departamenti bastyǵynyń burynǵy orynbasary Rahat Álıevtiń de qatysy bar. Sottalýshy Saıasat Dúsipov jaýap berý kezindek polıtsııa qyzmetkerin tanıtynyn, jaqyn dosy ekenin jasyrmady. Sot otyrysy kelesi beısenbide jalǵasady.
Eske salsaq, «Tórt aǵaıyndy» isi boıynsha bir aı boıy «TazaDalaKom» JShS reıderlik jolmen tartyp alý epızody qaraldy. Birer kúnde munaı urlyǵy epızodynyń aıyptalýshylary men kýágerlerinen jaýap alyndy.
