«Tórt aǵaıyndy» isi: Urlanǵan munaı baǵasy qaıta eseptelgende eki ese arzandady
AQTÓBE. QazAqparat - Aqtóbe oblystyq qylmystyq ister jónindegi mamandandyrylǵan aýdanaralyq sotynda urlanǵan munaıǵa qatysty taýarlyq saraptama jasaldy. Saraptama qorytyndysy kezinde munaı kompanııasynyń shyǵyny eki ese kemidi, dep habarlaıdy QazAqparat tilshisi.
Aqtóbede munaı urlady, satty, zańsyz saqtady dep aıyptalyp jatqan qylmystyq top Sınelnıkovskıı ken ornynan urlanǵan munaı baǵasyn qaıta esepteýdi suraǵan bolatyn. Sebebi, ken orny shyǵyny 38 mıllıon teńge bolǵanymen, baǵa áldeqaıda tómen bolǵan. Buǵan deıin habarlaǵanymyzdaı, munaıdyń taýarly baǵasyn eseptep shyǵarǵan sarapshy ár aıdaǵy ortasha baǵany anyqtady. Al búgin sot otyrysy kezinde urlanǵan munaıdyń naqty baǵasy 16 mıllıon 118 myń teńge boldy. Bul munaı kompanııasy eseptegen shyǵynnan eki ese az.
«KamAZ kóligimen munaı tasymaldaǵan júrgizýshi Rysqulov 686 myń, Berdenov 681 myń, Dermuhanov 6 mıllıon 237 myń, Qýanyshev 4 mıllıon 33 myń, Qultaev 4 mıllıon 479 myń teńge shyǵyn keltirdi. Bárin qosyp eseptegende 16 mıllıon 118 myń teńgeden asty», - dedi qaıta eseptep shyǵarǵan munaı kompanııasynyń ókili Jekeev.
Aıta keteıik, sottalýshy Saıasat Dúsipov ótinishhat túsirdi. Ol «SNPS-Aqtóbemunaıgaz» AQ talap etip otyrǵan 11 mıllıon teńgeden astam qarjyny azamattyq tártipte qaraýdy surap otyr. Tipti, ІІІ top múgedegi aı saıyn alatyn 33 myń teńge zeınetaqysyn aýdaryp otyrýǵa daıyn ekenin aıtyp berdi.
