«Tórt aǵaıyndy» isi: Sottalýshylardyń biri kinásin moıyndady
AQTÓBE. QazAqparat - Aqtóbede «Tórt aǵaıyndy» isi boıynsha sottalýshy Saıasat Dúsipov málimdeme jasady. Ol bar kinásin moıyndap, protsessýaldyq kelisimge keletinin aıtty, dep habarlaıdy QazAqparat tilshisi.
Aqtóbe oblystyq qylmystyq ister jónindegi mamandandyrylǵan aýdanaralyq sotynda Erkin Іzbasar, Aýhat Qalıev bastaǵan qylmystyq topqa qatysty sot otyrysy jalǵasyp jatyr. Búgin sottalýshy Saıasat Dúsipov kútpegen jerden usynys jasady. Ol tańerteń turyp, keshke deıin sot zalynda otyrý esh nátıje bermeıdi degen tujyrymǵa kelgen.
«Men bir aı boıy sot otyrysyna qatysyp júrmin. Onyń ne máni bar? Tórt, bes, alty, jeti degen aǵaıyndylarǵa esh qatysym joq. Tańerteń turyp, keshke keri abaqtyǵa oralýdyń ne máni bar? Sondyqtan osy sheshimge keldim», - dedi aıyptalýshy Saıasat Dúsipov.
Aqtóbe oblystyq prokýrorlary úsh kúnde kezdesýler ótkizip, protsessýaldyq kelisim týraly sheshimdi aıtýy kerek.
«Ashyq sot otyrysynda sottalýshy Saıasat Dúsipov protsessýaldyq kelisimge kelý týraly usynys aıtty. Sottalýshy, prokýratýra men jábirlenýshi birlesip, bir sheshige kelýi tıis. Kelisim sheshimi 10 qańtar kúni málim bolady», - dedi sýdıa Ahmetqalı Moldaǵalıev.
Aıyptaý aktisine súıensek, ótken jyly qamaýǵa alynǵan Saıasat Dúsipov «Tórt aǵaıyndy» isi boıynsha aıyptalyp jatyr. Ol munaı tasý isine qatysqan. Onyń júk kóligimen munaı tasý týraly usynysty aıyptalýshy Qaıyrgeldi Іzturǵanov aıtqan.
