«Tórt aǵaıyndy» isi: Sottalýshylar urlanǵan munaıdyń shyǵynyn qaıta esepteýdi surady
AQTÓBE. QazAqparat - Aqtóbede reıderlikpen aınalysty, uıymdasqan qylmystyq top qurdy, munaı urlady, ony zańsyz tasymaldady dep aıyptalyp jatqan top shyǵyndy qaıta esepteýdi surady, dep habarlaıdy QazAqparat tilshisi.
Aqtóbe oblystyq qylmystyq ister jónindegi mamandandyrylǵan aýdanaralyq sotynda búgin Erkin Іzbasar, Aýhat Qalıev bastaǵan 26 sottalýshyǵa qatysty sot otyrysy jalǵasty. Sotta Sınelnıkovskıı ken ornynyń shyǵynyn qaıta esepteý týraly ótinish tústi. Sottalýshylar shıki munaı urlanǵan ýaqytta onyń naryqtaǵy baǵasy qansha bolǵanyn anyqtaýdy jón kórip otyr. Sýdıa Ahmetqalı Moldaǵalıev naqty shyǵyndy anyqtaý úshin sot-taýarlyq saraptama taǵaıyndaý týraly usynysty qanaǵattandyrdy. Degenmen jábirlenýshi tarap eseptegen shyǵyn kólemi is qujattarynan shyǵarylmaıdy.
«Aıyptaý qorytyndysynda 2015 jyldyń maýsym, qyrkúıek, qazan, qarasha, jeltoqsan aılary men 2016 jyldyń aqpany bar. Sonymen qatar, 2016 jyldyń tamyz, qyrkúıek, qazan aıy tirkeldi. Sol aılarda bir tonna shıki munaıdyń baǵasy qansha boldy? Sınelnıkovksıı ken ornyndaǵy shıki munaı jeńil, ekinshi klasty. Bul saraptama kezinde anyqtalǵan. Endi biz sol kezdegi baǵany bilgimiz keledi»,- dedi sottalýshy S.Súgirbaevtyń qorǵaýshysy.
Sarapshy Marat Esmaǵambetov 2016 jyldyń 21-22 qazanynda bir tonna munaı 53 myń 77 teńge dep eseptegen. Qorǵaýshynyń aıtýynsha, buǵan deıin munaı urlyǵy boıynsha sottalyp, bir jyl shartty jaza alǵan sottalýshy S.Súgirbaevtyń isinde munaıdyń bir tonnasy 36 myń teńge dep eseptelgen. Eki istegi munaı baǵasyn salystyrǵan qorǵaýshy 20 myń teńgeniń aıyrmashylyǵyn kórgen soń ár aıda munaı baǵasy qansha bolǵanyn naqtylaýdy surady.
«Sınelnıkovskıı ken ornynan 17 ret munaı tasymaldanǵan. Ár aıda munaı baǵasy qansha bolǵanyn bilý qajet. Sarapshy shyǵyndy esepteý kezinde «Aman munaı», «Ada Oıl», «Saǵyz Petroleým», «Felkon oıl», «NS Ltd» JShS-niń jáne Aqtóbe oblystyq statıstıka departamentiniń tsıfrlaryn mysalǵa alǵan. Bul jerge «SNPS-Aqtóbemunaıgaz» AQ-nyń baǵa týraly aqparatyn qosýǵa bolady»,- dedi sottalýshy S.Súgirbaevtyń qorǵaýshysy.
Qorǵaýshylar Aqtóbe oblystyq statıstıka departamentinen munaı urlyǵy bolǵan ýaqyttaǵy qara altyn baǵasyn suratqanymen, eshqaısysy jaýap ala almady.
