«Tórt aǵaıyndy» isi: Sottalýshy advokattar men prokýrorǵa jaýap berýden bas tartty
AQTÓBE. QazAqparat - Aqtóbe oblystyq qylmystyq ister jónindegi mamandandyrylǵan aýdanaralyq sotynda «tórt aǵaıyndy» isi qaralyp jatyr. Sot aldynda jaýap bergen Qaldymurat Qartjan birer mınýttan soń qorǵaýshysyna, prokýrorlar men sýdıaǵa jaýap berýden bas tartty, dep habarlaıdy QazAqparat tilshisi.
Aqtóbe oblystyq qylmystyq ister jónindegi mamandandyrylǵan aýdanaralyq sotynda jasyryn kýágerler tyńdalyp bolǵan soń búgin sottalýshy Qaldymurat Qartjannan jaýap alyndy. Alǵashynda munaı urlyǵy, reıderlik jolmen bıznesti tartyp alý epızodtaryna qatysty óz jaýabyn bergen sottalýshy birer mınýttan soń óz qorǵaýshysyna da jaýap berýden bas tartty.
«Erkin Іzbasar, Aýhat Qalıev eshqandaı tapsyrma bergen joq. Jasyryn kýálardyń jaýaby shyndyqqa saı kelmeıdi. Shynymdy aıtsam, mektepte, jas kezimde sportpen aınalystym. Bul meniń qylmystyq topqa múshe ekenimdi bildirmeıdi. Bir psevdonım aqshany maǵan berip, Erkin Іzbasarǵa jetkizdi dep aıtqany shyndyqqa janaspaıdy. Ol ótirik. Sotqa deıingi bergen jaýabymnan bas tartamyn. Sebebi, tergeý toby meni májbúrledi. Otbasymmen qorqytty. Bir aı boıy janymda qorǵaýshy bolmady. 2017 jyldyń qańtarynda ustaldym, aqpan aıynda apam kelip, kezdesti. Keıin qorǵaýshy taǵaıyndaldy. «Qylmystyq top múshesi, qarý saqtady» degen taǵylǵan aıyppen kelispeımin. Osy jerden jaýap bermeımin, bas tartamyn»,- dedi Qaldymurat Qartjan.
Keıin sottalýshy Q.Qartjan sot alynda jaýap berip jatqan sottalýshy Birjan Amanqulov, Nurlan Noǵaev, Bolatbek Beketovtiń qorǵaýshylaryna jaýap bermedi. Sonymen qatar, prokýror men sýdıanyń suraqtary jaýapsyz qaldy. Degenmen sot otyrysy kezinde Qaldymurat Qartjannyń sot aldy tergeý kezindegi jaýaby oqyldy.
