«Tórt aǵaıyndy» isi: Sotta Erkin Іzbasar men Aýhat Qalıevti ustaǵan kezdegi beınejazba kórsetildi
Búgingi sot otyrysy kezinde Erkin Іzbasar men Aýhat Qalıevti ustaý operatsııasy kórsetildi. Almatyda júrgen olar tańerteń sadaqaǵa bara jatqan. Ulttyq qaýipsizdik komıtetiniń Almaty qalasy boıynsha departamenti aıyptalýshy Aýhat Qalıevti ustaý kezinde odan 1400 AQSh dollaryn, birneshe uıaly telefon men tapansha, sholaq myltyq tárkiledi.
Kólik ishinen shyqqan qarý-jaraqty Aýhat Qalıev ustamaǵanyn, ony bireýler ádeıi uıymdastyrǵanyn aıtty.
«Búgin ekinshi beıneni qarap otyrmyz. Beınematerıal kóliktiń janynan bastalǵan. Kólik janynda basyna qapshyq kıgen, kisen taǵylǵan úsh adam tur. Tergeýshi ustalǵan adamdardy tintý saǵat 14:24 bastalǵanyn málimdedi. Qylmystyq is boıynsha Toıota men Leksýs bir mezette (Erkin Іzbasar men Aýhat Qalıev mingen kólik - red.) ustaldy. E.Іzbasardyń kóligi caǵat 13:20 ustalyp, tintildi. Arada 1 saǵat 4 mınýt bar. Sol aralyqta Qalıev qaıda boldy? Tergeýshiler men krımınalıster ártúrli. Eki túrli top tintý júrgizse 1 saǵat kútýdiń ne qajeti bar edi?»,- dedi Aýhat Qalıevtiń qorǵaýshysy Tamara Balǵabaıqyzy. Qorǵaýshy sot otyrysy kezinde Aýhat Qalıevtiń basynan aıaǵyna deıin balshyq bolǵanyn, ony tintý kezinde qolyna temir zat ustatqanyn aıtty. Al sottalýshy Aýhat Qalıev: «Beınematerıaldy taıaýda ǵana alyp, tanysyp shyqtyq. Onda ústimdegi kıimderdiń las bolǵany anyq kórinip tur. Kólikti toqtatyp, ustaǵan kezde jerge jatqyzyp, qolyma 4 kisen salǵan. Bul ne masqara?»,- dedi.
Sýdıa Ahmetqalı Moldaǵalıev aıyptalýshy Aýhat Qalıev pen onyń qorǵaýshysy Tamara Balǵabaıqyzynyń ótinishin tyńdap, ustaý operatsııasy kezinde kúsh qoldaný faktisin tekserýdi jáne onyń sheshimin 15 qańtarda bolatyn sot otyrysynda shyǵarýǵa qaýly qabyldady. Sot sheshiminiń oryndalýyn prokýrorlar baqylaıdy.
Aıta keteıik, sot otyrysy kezinde Erkin Іzbasardan da qarý tabylǵany týraly beınematerıal kórsetildi. Zattaı aıǵaqtar sot zalyna ákelinip, tanystyryldy. Sot saraptamasy kezinde qarýdyń Erkin Іzbasar men Aýhat Qalıevke tıesili ekeni anyqtaldy.
Buǵan deıin habarlaǵanymyzdaı, olarǵa Qylmystyq kodekstiń «Munaıdyń jáne munaı ónimderiniń shyǵarylý zańdylyǵyn rastaıtyn qujattarsyz olardy tasymaldaý, ıemdený, ótkizý, saqtaý, sondaı-aq munaıdy qaıta óńdeý», «Uıymdasqan top, qylmystyq uıym qurý jáne olarǵa basshylyq etý, sol sııaqty olarǵa qatysý» baptary boıynsha aıyp taǵyldy.
Aqtóbe oblystyq qylmystyq ister jónindegi mamandandyrylǵan aýdanaralyq sotynda Erkin Іzbasar men Aýhat Qalıevke qatysty qylmystyq is qaraldy.
Іs boıynsha barlyǵy 26 aıyptalýshy bar. Olar: Adaıbek Sarsenov, Nurbolat Qaıyrbaev, Aıbek Tileýǵazıev, Aýhat Qalıev, Muhanbet Shavletov, Erkin Іzbasar, Bolatbek Beketov, Jandos Aqmaǵambetov, Jangeldi Ótegenov, Rýslan Dermuhanov, Amandos Esenǵalıev, Bekjan Qultaev, Nurlan Noǵaev, Saıasat Dúsipov, Súleımen Súgirbaev, Murat Turjanov, Sergeı Savchenko, Birjan Amanqulov, Erbol Tektiǵulov, Qaıyrkeldi Іzturǵanov, Nurlybek Tontaev, Janat Tektiǵulov, Kádirjan Pangereıuly, Murat Qýanyshev, Rahat Ahanov, Qartjan Qaldymurat.