«Tórt aǵaıyndy» isi: Polıtsııa qyzmetkeri 28 mıllıon teńgeni qolma-qol alý úshin kazınoǵa barǵan
AQTÓBE. QazAqparat - Aqtóbede munaı urlyǵyna qatysty qylmystyq iste ІІD bastyǵynyń burynǵy orynbasary Rahat Ahanov jaýap berdi. Ol esepshotyna túsken 28 mıllıon teńgeniń dosyna tıesili ekenin, ony qolma-qol alý úshin kazınoǵa barǵanyn jasyrmady, dep habarlaıdy QazAqparat tilshisi.
Aqtóbe oblystyq qylmystyq ister jónindegi mamandandyrylǵan aýdanaralyq sotynda qylmystyq toptyń munaı urlyǵyna qatysty epızody qaralyp jatyr. Bul iste ІІD bastyǵynyń burynǵy orynbasary Rahat Ahanovtan jaýap alyndy. Ol sottalýshy Saıasat Dúsipovten qaryzǵa aqsha alǵanyn jasyrmady. Buǵan deıin habarlaǵanymyzdaı, Rahat Ahanov «qylmystyq topqa kómektesti» degen aıyppen kelisken joq. https://kaz.inform.kz/news/tort-agayyndy-isi-munay-urlygyna-komektesken-iid-bastygynyn-orynbasary-kinasin-moyyndamady_a3155748 Sot otyrysy kezinde Rahat Ahanovtyń jumystaǵy seıfinde nege aqsha saqtalǵany jáne esepshottaǵy 28 mıllıon teńge kimge tıesili bolǵany aıtyldy.
«2016 jyly Almaty qalasynda em qabyldadym. Sol kezde áýejaıda tanysymdy kezdestirip, ol maǵan esepshotyma aqsha aýdaryp, ony qolma-qol alýǵa ótinish jasady. Sol kezde esepshotqa 28 mıllıon teńge túsip, qolma-qol aqsha alý úshin Qapshaǵaıdaǵy kazınoǵa barýǵa týra keldi. Ózim jylyna bir ret kazınoǵa baram. Ol ádetke aınalyp ketken», - dedi sottalýshy Rahat Ahanov.
Eske salsaq, sot otyrysy kezinde Rahat Ahanov óz abyroıyn tógetin ispen aınalyspaǵanyn qaıtalady. Ózi tanıtyn sottalýshy Saıasat Dúsipov pen jazasyn óteýshi Esenjan Erketaev arasynda munaı urlaý, tasymaldaý kezinde kómektesý jaıly sóz bolmaǵanyn jetkizdi.
Sot otyrysy kelesi aptada jalǵasady.
