«Tórt aǵaıyndy» isi: Olımpıada chempıony ıÝrıı Melnıchenko sotqa qatysty
AQTÓBE. QazAqparat - Aqtóbe oblystyq qylmystyq ister jónindegi mamandandyrylǵan aýdanaralyq sotynda «tórt aǵaıyndy» isi qaralýda. Búgin sotqa qatysqan Olımpıada chempıony ıÝrıı Melnıchenko aıyptalýshy Erkin Іzbasar týraly aıtyp berdi, dep habarlaıdy QazAqparat tilshisi.
«Erkin Іzbasardy Keńes odaǵynan beri tanımyn. Men grek-rım kúresinen Keńes odaǵynyń quramynda boldym. Sol kezde komandaǵa Esengeldi Batyrǵarın engen bolatyn. Ol Aqtóbe oblysy, Shalqar aýdanynyń týmasy. Jarystarǵa qatysyp júrgende Erkin Іzbasarmen kezdestim. Esengeldi Erkinmen dos boldy. Erkin Іzbasar jattyǵý zalyna kelip, jankúıer, sport janashyry retinde tanyldy. Keıin jarystarda jolymyz túıisti. Gýanchjoý qalasynda ótken Azııa oıyndarynda boldyq. Bul 8-10 jyl buryn bolǵan jaǵdaı", - dedi ıÝ. Melnıchenko. Ol sondaı-aq, Erkin Іzbasar men Aýhat Qalıevti jaqsy jaǵynan ǵana aıta alatynyn jetkizdi. "Keńes odaǵy qulaǵan kezde Aqtóbe oblysynda sport quldyrap ketti. Janashyr adamdardyń qoldaýy kerek boldy. Sol qoldaýdy Erkin Іzbasar jasap, balýandardy kóterdi. 2015 jyldan bastap aqtóbelik balýandar Qazaqstan quramasyna endi. Onyń ishinde Azııa chempıony Nurıslam Sanaev ta bar»,- dedi Olımpıada chempıony ıÝrıı Melnıchenko.
Keıin ıÝrıı Melnıchenko sottalýshy Erkin Іzbasar tek Qazaqstan emes, Reseı Federatsııasynyń sportshylary arasynda da keń tanylǵanyn jasyrmady. Al sýdıa Ahmetqalı Moldaǵalıev sportshylarǵa qoldaý bildirip júrgen Erkin Іzbasardyń qarjyny qaıdan alatynyn surady.
«Men ony bilmeımin. Kásipkerlikpen aınalyspaımyn, biz jarystarda kezdesip turamyz. Odan suraǵan da emespin. Metsenat bolyp júrgen jalǵyz ol emes. Elimizde sportty qoldap, ınvestıtsııa salyp júrgen adam kóp»,- dedi ıÝrıı Melnıchenko.
Aıta keteıik, Erkin Іzbasar týraly sot otyrysyna qatysyp, ony qoldaýǵa Daǵystannan sportshy Tımýr Gadısev ta kelgen.
«Erkin Іzbasar Qazaqstan sportyn damytyp júrgen adam. Ol árdaıym sportshylardyń janynda bolýǵa daıyn. Sportshylardy jattyǵýǵa jiberip, únemi shyńdap otyratyn. Men ol týraly aıtý úshin Qazaqstanǵa kelip otyrmyn. Qajet bolsa Afrıka, AQSh-qa jaıaý, velosıpedpen bolsa da barar edim»,- dedi Tımýr Gadısev.
Eske salsaq, Aqtóbe oblystyq qylmystyq ister jónindegi mamandandyrylǵan aýdanaralyq sotynda Erkin Іzbasar, Aýhat Qalıev bastaǵan qylmystyq topqa qatysty is qaralyp jatyr. Olarǵa munaı urlyǵy, zańsyz saqtady, satty jáne reıderlik jolmen bótenniń múlkin tartyp aldy dep aıyp taǵylǵan. Barlyǵy 26 sottalýshyǵa qatysty qylmystyq istiń qaralyp jatqanyna 4 aı boldy.
