«Tórt aǵaıyndy» isi: Munaı urlyǵyna kómektesken ІІD bastyǵynyń orynbasary kinásin moıyndamady

Aqtóbe oblystyq qylmystyq ister jónindegi mamandandyrylǵan aýdanaralyq sotynda munaı urlaǵan toptyń kedergisiz júrip, qara altyndy tasymaldaýyna kómek bergen oblystyq ІІD bastyǵynyń orynbasary Rahat Ahanov óz kinásin moıyndamady. Іs materıaldaryna súıensek, polıtsııa qyzmetkerine aqshany sottalýshy Saıasat Dúsipov pen munaı tasymaldaǵany úshin shartty túrde 5 jylǵa sottalǵan Esenjan Erketaev berip otyrǵan. 

«Men olardyń qylmystyq ispen aınalysatynyn bilmedim. Jınalysta ádemi sózder aıtyp, esikten shyǵa bere qıturqy is jasaıtyn adam emespin. Bar bolǵany 300-400 myń teńge úshin men abyroıymdy tókpeımin. Esenjan Erketaevpen toıda tanysyp, jaqsy aralastym. Onyń sottalǵanyn bilmeımin»,- dedi sottalýshy Rahat Ahanov.

Sot otyrysy kezinde Rahat Ahanov Erkin Іzbasardy syrttaı tanıtynyn, olardyń arnaıy baqylaýda bolǵanymen eshqandaı quqyq buzýshylyq tirkelmegenin jetkizdi.
 

«Apta saıyn uıymdasqan qylmysqa qarsy kúres basqarmasy qylmystyq ahýaldy baıandap turdy. Erkin Іzbasardyń qaıda ekenin bilip otyrý mindeti bar. Múlik urlaýda, esirtkige qarsy kúreste, dástúrli emes dinde de bolmady. Onyń sportshylardy qoldap, demeýshi bolǵanyn bilemiz. Onyń munaı isine de qatysy bar is departamentke túspedi»,- dedi Rahat Ahanov.

Aıta keteıik, sot otyrysy kezinde sottalýshy Erkin Іzbasardyń qorǵaýshysy Sársenova prokýrordyń jymıyp, ádepsiz qylyq kórsetetine eskertý jasady. Sýdıa Ahmetqalı Moldaǵalıev sot otyrysy kezinde prokýrorǵa suraqtyń jaýabyn tyńdap, naqty saýal qoıýǵa, óz emotsııasyn kórsetpeýge shaqyrdy. Buǵan deıin habarlaǵanymyzdaı, sottalýshy Saıasat Dúsipov ózi júrgizgen kitapshada «Ráke» degen adamǵa únemi aqsha berilgenin jazdy. Bul aqsha Rahat Ahanovqa berilgen. Sot otyrysy kezinde Saıasat Dúsipov tanysy R.Ahanovqa aqshany qaryzǵa bergenin jasyrmady.