«Tórt aǵaıyndy» isi: Munaı urlaǵandardyń biri polıtsııa basshysymen saýnada tanysqan

AQTÓBE. QazAqparat - Aqtóbe oblystyq qylmystyq ister jónindegi mamandandyrylǵan aýdanaralyq sotynda munaı urlyǵyna qatysty qylmystyq toptyń isi qaralyp jatyr. Kýáger Esenjan Erketaev munaı urlyǵy kezinde kómektesken polıtsııa bastyǵynyń orynbasaryna aı saıyn 300-500 myń teńge berdi, dep habarlaıdy QazAqparat tilshisi.

Búgin Aqtóbe oblystyq qylmystyq ister jónindegi mamandandyrylǵan aýdanaralyq sotynda ІІD bastyǵynyń burynǵy orynbasary Rahat Ahanov jaýap berdi. Ol qylmystyq topqa qatysy joq ekenin, sottalýshylardan tek qaryzǵa aqsha alǵanyn jetkizdi.

Al kýáger Esenjan Erketaev munyń bárin joqqa shyǵaryp, munaı tasymaldaý kezinde Rahat Ahanovtyń kómekteskenin, bul qyzmeti úshin aı saıyn 300-500 myń teńge aqsha alǵanyn aıtty.

«Men 2014 jyly toıda Qaıyrkeldi Іzturǵanovpen tanystym. Ol meniń jumysymdy surady. Sol kezde janar-jaǵarmaı tasymaldaıtynymdy aıtyp edim, shıki munaı satyp alý, satý usynysyn aıtty. Shıki munaıdy peshke jaǵady eken. Arada jarty jyl ótkende janar jaǵarmaı beketinde taǵy kezdesip, sóılestik. Men Rahat Ahanovty da tanımyn. Ekeýmizdiń Astanada turatyn ortaq dosymyz bar. Aqtóbedegi saýnalardyń birinde tanysyp, jaqyn aralasyp kettik. Ol kez kelgen suraqpen habarlasyp, kómek suraýǵa bolady dep aıtty. Osy sóz este qalyp, men «qujatsyz shıki munaı tasymaldasam kómek kórsetesiz be» dep usynys aıttym. Eshqandaı kedergi joq ekenin aıtqan soń, munaıdy ótkizetin de jer izdedim. Sol kezde janar-jaǵarmaı stantsııasynyń basshysy Adaıbek Sársenovpen kelistim. Іzturǵanovpen qaıta kezdesip, munaı tasymaldaý bastaldy»,- dedi kýáger Esenjan Erketaev.

Kýáger sot otyrysy kezinde Rahat Ahanovqa barlyǵy 1 mıllıon 750 myń teńge bergenin aıtty. Al munaıdy «Saǵyz Petroleým» JShS-niń Qaǵanaı, «SNPS-Aqtóbemunaıgaz» AQ Qaratóbe ken ornynan tasymaldady. Aqtóbe oblysy, Baıǵanın aýdanyndaǵy ken oryndarynan 29 ret shıki munaı tasymaldanyp, Aqtóbe qalasyndaǵy «Tranzıt» janar- jaǵarmaı stantsııasyna jetkizgen.

«Men Rahat Ahanovqa qujatsyz munaı tasymaldaıtyn kólikterdiń nómerin berip qoıdym. Olardy jolda polıtsııa toqtatpady. Qyzmetine aqsha tóleýdi umytqan joqpyz. Alǵashynda 350 myń teńge boldy. Keıin aqshany az kórip, 400-500 myń teńge surady. Aqshany bir ret ózine, qalǵanyn júrgizýshisine berdim»,- dedi kýáger Esenjan Erketaev.

Aıta keteıik, kýáger Esenjan Erketaev buǵan deıin munaı tasymaldap, satqany úshin 5 jylǵa shartty túrde bas bostandyǵynan aıyryldy. Qazir ol jazasyn bostandyqta ótep júr.