«Tórt aǵaıyndy» isi: Munaı kompanııasynyń basshylyǵy nelikten aryzdanǵanyn túsindire almady
AQTÓBE. QazAqparat - Aqtóbede munaı urlyǵyna qatysty qylmystyq istiń sot otyrysynda «SNPS-Aqtóbemunaıgaz» AQ bas dırektorynyń birinshi orynbasary, kýáger Tahtalıfým Esenqulov jaýap berdi. Ol aryz-shaǵymda kórsetilgen shyǵynnyń qaıdan shyqqanyn túsindire almady, dep habarlaıdy QazAqparat tilshisi.
Aqtóbedegi qylmystyq ister jónindegi mamandandyrylǵan aýdanaralyq sotyna Erkin Іzbasar, Aýhat Qalıev bastaǵan qylmystyq topqa qatysty is qaralyp jatyr. Búgin munaı kompanııalarynyń ókilderinen jaýap alyndy. Sot otyrysy kezinde «SNPS-Aqtóbemunaıgaz» AQ bas dırektorynyń birinshi orynbasary, kýáger Tahtalıfým Esenqulov ózine qaýipsizdik departamenti bastyǵynyń orynbasary Abaı Saqtaǵanov kelip, Rahat Ahanov týraly aıtyp bergenin málimdedi. Buǵan deıin habarlaǵanymyzdaı, Aqtóbe oblystyq ІІD bastyǵynyń orynbasary Rahat Ahanov kompanııa qyzmetkerlerine óz atynan barǵan adamdardyń sharýasyn sheshýdi tapsyrǵan.
«Abaı Saqtaǵanov ózine Rahat Ahanovtyń habarlasqanyn aıtqan kezde, bul tekserý dep oıladym. Sondyqtan eshteńege aralaspaı, jumys isteýdi tapsyrdym. Bul birinshi jáne sońǵy áńgime boldy. Ózim Rahat Ahanovty jeke tanymaımyn. Jınalystarda ǵana kórdim. Kompanııa Іshki ister departamentimen tikeleı jumys istemeıdi. Biraq olar ýly zattardyń saqtalýyn, maqsatty qoldanylýyn qadaǵalap otyrady», - dedi «SNPS-Aqtóbemunaıgaz» AQ bas dırektorynyń birinshi orynbasary, kýáger Tahtalıfým Esenqulov.
Munaı urlyǵy epızody kezinde «SNPS-Aqtóbemunaıgaz» AQ-y sottalýshy Saıasat Dúsipovten 11,7 mıllıon teńgeden astam shyǵyn óndirýdi talap etip otyr. Kýáger Tahtalıfým Esenqulov bul talaptyń qalaı qoıylǵanyn naqty aıta almady. Ári sottalýshy Saıasat Dúsipov shyǵyn óndirýdi qylmystyq is aıasynda emes, azamattyń is boıynsha qaraýdy surady.
«Quqyqtyq qyzmet departamentine tapsyrma berip, Saıasat Dúsipovtiń qorǵaýshysymen sóılesýge, kelisimge kelýge tapsyrma berdim. Negizinen munaı urlyǵyn anyqtaý qıyn. Ár uńǵymadan kelgen munaı zaýytqa túsedi. Bizdi shamamen 2 myńǵa jýyq uńǵyma bar»,- dedi Tahtalıfým Esenqulov. Keıin ol aryz jazbaǵanyn, ispen tanyspaǵanyn jetkizdi.
Aıta keteıik, «SNPS-Aqtóbemunaıgaz» AQ-y Temir, Baıǵanın, Muǵaljar aýdanyndaǵy tórt ken ornyna munaı-gaz shyǵarady. Ótken jyly 3,9 mıllıon tonna taýarly munaı, 5,9 mıllıard tekshe metr gaz, 636 myń tonna suıytylǵan gaz, 506 tonna kúkirt óndirildi. Kompanııa munaı ónimderin bólshektep satpaıdy.
«Munaı shyǵatyn aýylda ósken balalarmyz. Óndiriletin munaı baǵasyn eseptegende 10 mıllıard dollardan astam aqsha shyǵyp tur. Al Saıasat Dúsipovten 11 mıllıon teńge shyǵyndy óndirýge aryz tústi. Shyǵynnyń qaıdan shyqqanyn bilmeımiz. Shyǵyndy keshirýge nemese jetimder úıine aýdarýǵa bolmaı ma? Bárimiz qazaqtyń balalarmyz»,- dedi sottalýshy Murat Turjanov.
Sot otyrysy 15 aqpan kúni jalǵasady.
