«Tórt aǵaıyndy» isi: Іzbasar men Qartjanǵa taǵylǵan aıyptyń bireýi alynyp tastaldy
AQTÓBE. QazAqparat - Aqtóbede uıymdasqan qylmystyq top qurdy, munaı urlady, saqtady, satty dep aıyp taǵylǵan toptyń isi boıynsha barlyq epızod qaraldy. Sot Erkin Іzbasar men Qaldymurat Qartjanǵa taǵylǵan aıyptyń bireýin alyp tastady, dep habarlaıdy QazAqparat tilshisi.
Aqtóbe oblystyq qylmystyq ister jónindegi mamandandyrylǵan aýdanaralyq sotynda búgin qorǵaýshylar men memlekettik aıyptaýshylardan, sottalýshylardan ótinishter qabyldandy. Qazirgi ýaqytta uıymdasqan qylmystyq top qurdy, munaı urlady, zańsyz satty dep aıyp taǵylǵan sottalýshylarǵa qatysty barlyq epızod qaraldy. Búgin prokýrorlar Erkin Іzbasar men Qaldymurt Qartjanǵa qatysty «Bılik ókiline baǵynbaý» babyn alyp tastady. Sebebi, 2017 jyldyń aıaǵynda Qylmystyq kodekske ózgertýler men tolyqtyrýlar engizilgen bolatyn.
«Sot aldy tergeý jumystaryn júrgizýshiler «sottalýshy Erkin Іzbasar 2016 jyldyń jeltoqsan aıynda tergeý ızolıatorynda bılik ókiline baǵynbaǵan» dep aıyp taqty. Ol saýsaq izin alýǵa qarsylyq bildirgen. Al sottalýshy Qaldymurat Qartjan 2017 jyldyń qańtar aıynda ustaý operatsııasy kezinde qarsylyq bildirgen. Bul úshin Erkin Іzbasar men Qaldymurat Qartjanǵa Qylmystyq kodekstiń «Bılik ókiline baǵynbaý» baby boıynsha aıyp taǵyldy. Basty sot talqylaýy kezinde taǵylǵan aıypty toqtatýǵa ótinish tústi. Sebebi, Qylmystyq kodeks ózgerdi. «Bılik ókiline baǵynbaý» baby boıynsha taǵylǵan aıypty toqtatýǵa sheshim qabyldandy», - dedi sýdıa Ahmetqalı Moldaǵalıev.
Eske salsaq, Aqtóbe oblystyq qylmystyq ister jónindegi mamandandyrylǵan aýdanaralyq sotynda munaı urlyǵyna qatysty uıymdasqan qylmystyq top isi qaralyp jatyr. Barlyǵy 26 adam 2003-2016 jyldardaǵy qylmystyq is boıynsha jaýap berýde. Erteń munaıdyń taýarlyq saraptamasy shyǵarylady. Bul munaı kompanııalarynyń shyǵynyn qaıta esepteýge múmkindik beretin saraptama bolyp otyr.
