«Tórt aǵaıyndy» isi: Erkin Іzbasar jasyryn kýágerlermen kezdesýdi surady
AQTÓBE. QazAqparat - «Tórt aǵaıyndy» qylmystyq tobyn quryp, basqardy dep aıyp taǵylǵan Erkin Іzbasar búgin jasyryn kýágerlermen betpe-bet kezdestirýdi surady, dep habarlaıdy QazAqparat tilshisi.
Aqtóbe oblystyq qylmystyq ister jónindegi mamandandyrylǵan aýdanaralyq sotynda Erkin Іzbasar bastaǵyn qylmystyq topqa qatysty sot otyrysy jalǵasyp jatyr. Bir apta boıy jasyryn kýágerler tyńdalyp, onda 13 adam jaýap bergen bolatyn. Búgin sottalýshy Erkin Іzbasar búrkenish kýágerlermen betpe-bet kezdestirýdi, olardy jasyryn ustaǵanymen, kim ekeni anyqtalǵanyn jetkizdi.
«Sot zalynda jasyryn adamdarmen ashyq kezdesip, sóıleseıik. Biz bir-birimizdi tanımyz, jasyrýdyń qajeti joq. Aıtqan soń bárin ashyq júrgizeıik. Suraqty basynan bastap qoısaq dep aıtyp otyrmyn. Spektakl bolyp ketti ǵoı»,- dedi sottalýshy Erkin Іzbasar.
Keıin Erkin Іzbasardyń qorǵaýshysy Myrzaǵaraev ótinishhat túsirdi.
«Biz tańnan keshke deıin sot zalynda otyrmyz. Tergeý ızolıatorynda qorǵaýshylarmen kezdesý úshin kezek kútý kerek. Kýágerlerdiń biri ýaqytsha tergeý ızolıatorynda, biri aýrýhanada jatyr. Sondyqtan eki kún berip, jaýap berýge daıyndalýdy suraımyn»,- dedi qorǵaýshy Myrzaǵaraev.
Eske salsaq, Aqtóbe oblystyq qylmystyq ister jónindegi mamandandyrylǵan aýdanaralyq sotynda munaı urlyǵyna qatysty uıymdasqan qylmystyq top isi qaralyp jatyr. Barlyǵy 26 adam 2003-2016 jyldardaǵy qylmystyq is boıynsha jaýap berýde.
