«Tórt aǵaıyndy» isi: Erkin Іzbasar sotta óleń oqydy

Aqtóbe oblystyq qylmystyq ister jónindegi mamandandyrylǵan aýdanaralyq sotynda qylmystyq top qurdy, munaı urlady, zańsyz saqtap, tasymaldady dep aıyptalǵan Erkin Іzbasar jaýap berýde.

Ol sot otyrysy barysynda ómiri men densaýlyǵy, tergeý kezinde ózin uryp-soqqany týraly aıtty. Sondaı-aq taǵylǵan aıyppen kelispeıtinin jetkizdi. Keıin óleń oqydy.

Erkin Іzbasardyń aıtýynsha, ol 1997 jyly jol-kólik oqıǵasy saldarynan arbaǵa tańylǵan. Sodan beri 13 ret ota jasatqan.

«Úshinshi ret sotqa kelip turmyn. Meni sottaı bere me?  Meni qamap, uryp-soǵyp, tisimdi syndyryp tastady. Qyzýym da kóterilip otyr edi. Qapty basyma kıgizdi.

«Qınamaıdy abaqtyǵa japqany,

Qıyn emes, darǵa asqany atqany.

Maǵan qıyn osylardyń bárinen,

Óz aýylymnyń ıtteri úrip-qapqany», dep aıtqym keledi. Al Aýhat Qalıev únemi janymda júrdi. Bul bosqa otyr, meni kóterip júrgeni úshin. Meni kúnine 8-12 adam kóterip júredi. «Nege kómektesesiń?» dep suraıdy. Men úshin, saýaby úshin tasydy»,- dedi ol.

Aıta keteıik, keshe sottalýshy Qaldymurat Qartjan sot aldy jaýap alý kezinde ózin azaptaǵanyn jetkizgen bolatyn. Sondyqtan ol sotqa deıin bergen jaýabynan bas tartty.

Sot otyrysy jalǵasyp jatyr. 

Eske salaıyq, 2017 jyldyń qarasha aıynda Aqtóbede munaı urlyǵy boıynsha E. Іzbasar jáne uıymdasqan qylmystyq topqa  qatysty is sotqa jiberilgen bolatyn. Basty aıyptalýshy - «aǵaıyndy tórteý» laqap atymen belgili Erkin Іzbasarov.

Qylmystyq top músheleri «Munaıdyń jáne munaı ónimderiniń shyǵarylý zańdylyǵyn rastaıtyn qujattarsyz olardy tasymaldaý, ıemdený, saqtaý, ótkizý, sondaı-aq munaıdy qaıta óńdeý», «Uıymdasqan top, qylmystyq uıym qurý jáne olarǵa basshylyq etý, sol sııaqty olarǵa qatysý» jáne basqa da aýyr jáne óte aýyr quqyqbuzýshylyq sanatyna jatatyn baptar boıynsha aıyptalýda. Qylmystyq isti Ulttyq qaýipsizdik komıtetiniń vedomstvoaralyq jedel-tergeý toby, sonymen qatar ІІM, Sybaılas jemqorlyqqa qarsy kúres ulttyq bıýrosy, oblystyq prokýratýranyń protsessýaldy prokýrorlary tergedi.

Qylmystyq is boıynsha barlyǵy 26 sottalýshy bar. Olar: Adaıbek Sársenov, Nurbolat Qaıyrbaev, Aıbek Tileýǵazıev, Aýhat Qalıev, Muhanbet Shavletov, Erkin Іzbasar, Bolatbek Beketov, Jandos Aqmaǵambetov, Jangeldi Ótegenov, Rýslan Dermuhanov, Amandos Esenǵalıev, Bekjan Qultaev, Nurlan Noǵaev, Saıasat Dúsipov, Súleımen Súgirbaev, Murat Turjanov, Sergeı Savchenko, Birjan Amanqulov, Erbol Tektiǵulov, Qaıyrkeldi Іzturǵanov, Nurlybek Tontaev, Janat Tektiǵulov, Kádirjan Pangereıuly, Murat Qýanyshev, Rahat Ahanov, Qartjan Qaldymurat.