«Tórt aǵaıyndy» isi: Aǵyp jatqan munaıdy satyp, aqsha tappaq bolǵan
AQTÓBE. QazAqparat - Aqtóbe oblystyq qylmystyq ister jónindegi mamandandyrylǵan aýdanaralyq sotynda «tórt aǵaıyndy» isi qaralyp jatyr. Sottalýshy Súleımen Súgirbaev munaıdy aqsha tabý úshin satqanyn moıyndady, dep habarlaıdy QazAqparat tilshisi.
Aqtóbede «tórt aǵaıyndy» isi boıynsha «Aşykól», «Qaǵanaı», «Qaratóbe», «Sınelnıkovskıı» ken oryndarynan munaı urlaǵandardyń epızody qaralyp jatyr. Búgin Sınelnıkovskıı ken ornynan munaı tasyǵan sottalýshylar jaýap berdi. Sottalýshy Muhanbet Shavletov Jańajol, Qojasaı aýyldaryna jaqyn mańnan ıesiz jatqan munaı tsısternasyn taýyp alyp, ony KamAZ kóligimen tasymaldaǵanyn jasyrmady. Óz qyzmeti úshin 70 myń teńge alǵan. Barlyǵy 4 ret munaı tasyp, árbir reıste munaıdy tsısternadan quıyp alýǵa kómektesken.
«Ol jer ıesiz. Sebebi, jer lastanǵan, ekologııalyq talaptar buzylǵan. Aǵyp jatqan munaıdy quıyp alyp, paıda taptym. Ken ornynan 200-300 metr qashyqtyqta munaıshylar qalashyǵy boldy. Baqylap júrgen kúzetshilerdi kórmedim»,- dedi eshqaıda ketpeý týraly qolhatpen bostandyqta júrgen sottalýshy Muhanbet Shavletov.
Al sottalýshy Aıbek Tileýǵazıev taǵylǵan aıypty tolyq moıyndady. Ol 2016 jyldyń tamyz-qazan aılarynda Sınelnıkovskıı ken ornynan munaı tasyǵan. Turaqty jumysy joq sottalýshy munaıdy sot aldynda jaýap berip otyrǵan Janat Tektiǵulov, Muhanbet Shavletovpen birge urlady. Al KamAZ júrgizýshisi bolǵan Bekjan Qultaev birneshe ret munaı tasymaldaýǵa kómektesken. Ol óz qyzmeti úshin aı saıyn 100-120 myń teńge alyp otyrdy. Sot otyrysy kezinde sottalýshy Súleımen Súgirbaev ózine taǵylǵan aıyppen tolyq kelisken joq. Aıyptaý qorytyndysyna súıensek, Sınelnıkovskıı ken ornynan urlanǵan munaıdyń shyǵyny 38 mıllıon teńgeni quraǵan.
«Men munaıdy Rýslan Dermuhanovpen birge tasymaldadym. Meniń mindetim Sınelnıkovskıı ken ornyndaǵy munaıdy tıep berý boldy. Negizi maǵan ken ornyn Janat Tektiǵulov kórsetti. Ol tym kóp ishimdik ishken soń birge jumys istep, munaı tasý múmkin bolmady. Keıin Adaıbek Sársenovpen tanysyp, birge jumys istedim. Ol maǵan lıtrine 20-25 teńgeden tóledi. Barlyǵy 6 ret munaı tasymaldandy. Bul bıznes boldy. Tegin kelip jatqan soń munaı men onyń quramyndaǵy sýdyń mólsherin sanamadyq. Biz aǵyp jatqan munaıdy satyp, aqsha tapqymyz keldi»,- dedi sottalýshy Súleımen Súgirbaev.
Aıta keteıik, Súleımen Súgirbaev buryn da munaı urlyǵymen sottalyp, jazasyn alǵan.
