«Tórt aǵaıyndy» isi: 13 kýáger daýysyn ózgertip, beınebaılanys arqyly jaýap beredi
AQTÓBE. QazAqparat - Aqtóbe oblystyq qylmystyq ister jónindegi mamandandyrylǵan aýdanaralyq sotynda «tórt aǵaıyndy» isi jabyq túrde ótedi. Barlyǵy 13 kýáger ózderiniń jáne otbasylarynyń ómiri úshin alańdap, aty-jónderin, daýystaryn ózgertip, beınebaılanys arqyly shyǵýdy surady. Ári sot zalynda sottalýshylar bolmaıdy, dep habarlaıdy QazAqparat tilshisi.
Buǵan deıin habarlaǵanymyzdaı, Erkin Іzbasar men Qaldymurat Qartjanǵa qatysty Qylmystyq kodekstiń «Bılik ókiline baǵynbaý» baby alynyp tastaldy. Sonymen qatar, urlanǵan munaıdyń naqty baǵasyn anyqtaý úshin taýarlyq saraptama taǵaıyndaldy. Búgin sot otyrysy kezinde memlekettik aıyptaýshy Aıbek Shoqparov kýágerlerdiń qaýipsizdigi úshin olardyń Arman, Asanov, Qýat, Qanat búrkenshik esimderimen jaýap berýine ruqsat surady. Sonymen qatar, kýágerlerdiń daýysy men túrin tanýǵa múmkindik bermeıtin beınebaılanys uıymdastyrýǵa ótinishhat túsirdi.
«Arman, Asanov, Qýat, Qanat búrkenshik esimderimen jaýap beretin kýágerlerden jaýap alý jabyq ótedi. Olardyń daýysyn, túrin tanyp qalmaýy úshin beınebaılanysqa shyǵady. Sonymen qatar, sottalýshylar sot zalynan shyǵarylady.Sot zalynda tek kásibı qorǵaýshylar qalady»,- dedi sýdıa Ahmetqalı Moldaǵalıev.
Sot otyrysy kezinde Aýhat Qalıev pen Erkin Іzbasardyń qorǵaýshylary birneshe ótinishhat túsirdi. Qorǵaýshylar aty-jónderin atap, túr-tulǵasyn kórsetýge qorqatyn barlyǵy 13 kýágerdiń naqty anketalyq aqparatyn sot otyrysy kezinde anyqtaýdy surady. Sonymen qatar, qorǵaýshy Myrzaǵaraev aıyptaý qorytyndysy kezinde búrkenshik atpen jaýap bergen kýágerlerdiń birneshe ret qaıtalanyp otyrǵanyn jasyrmady.
Sot otyrysy erteń jalǵasady.
Eske salsaq, Aqtóbe oblystyq qylmystyq ister jónindegi mamandandyrylǵan aýdanaralyq sotynda munaı urlyǵyna qatysty uıymdasqan qylmystyq top isi qaralyp jatyr. Barlyǵy 26 adam 2003-2016 jyldardaǵy qylmystyq is boıynsha jaýap berýde.
