Tórt adamnyń ómirin qıǵan jol apatyna qatysty qylmystyq ister baqylaýǵa alyndy - BQO prokýratýrasy

ORAL. QazAqparat -  2 maýsym kúni Podstepnyı - Fedorov - RF shekarasy jolynyń 77-shaqyrymynda oryn alǵan iri jol apatyna baılanysty qylmystyq ister qozǵalyp, tergelýde, dep habarlaıdy «QazAqparat» tilshisi.

BQO prokýratýrasynyń baspasóz qyzmetinen túsken málimetke qaraǵanda, tórt kisiniń ómirin qıyp, 10 adamǵa dene jaraqatyn keltirgen oqıǵa boıynsha QR QK 345-baby 4-bólimine sáıkes (abaısyzda eki nemese odan da kóp adamnyń ólimine soqtyrǵan kólik quraldaryn júrgizýshilerdiń jol erejesin buzýy) sotqa deıingi tergep-tekserý bastalǵan edi. Oblys prokýratýrasynyń nusqaýy boıynsha atalmysh is BQO ishki ister departamenti anyqtaý basqarmasynyń óndirisine qabyldanyp, qazirgi ýaqytta tergeý amaldary júrgizilýde.

Zardap shekkenderdiń múlikterin urlaý deregi QR QK 188-baby 1-bólimine sáıkes Bórli aýdandyq ishki ister bólimimen tergelýde.

Qylmystyq isterdiń tergelýi oblys prokýratýrasynyń erekshe baqylaýyna alyndy.

Oǵan qosa jolaýshylardy kózdegen jerine jetkizý, sonyń ishinde qalaaralyq baǵytta tasymaldaý barysyndaǵy jol qaýipsizdigin qamtamasyz etýdiń zańdylyǵyna taldaý júrgizilýde. Taldaýdyń nátıjesi boıynsha tıisinshe sharalar qabyldanatyn bolady.

Eske sala keteıik, 2 maýsym kúni saǵat 18.40 shamasynda atalmysh joldyń 77-shaqyrymynda Oral men Aqsaı qalalarynyń aralyǵynda (Bórli aýdanynda) qos birdeı «Folksvagen Sharan» avtokóligi soqtyǵysqan bolatyn.