Tórt adamdy óltirgen Sultan Sarsemalıev «Qara búrkittiń» ornyna Ulytaýǵa jiberildi
ATYRAÝ.KAZINFORM – Atyraýda tórt adamdy qasaqana óltirip, ómir boıyna bas bostandyǵynan aıyrylǵan Sultan Sarsemalıev jazasyn «Qara búrkit» túrmesinde emes, Ulytaý oblysyndaǵy mekemede óteıtin boldy.
Aldyn ala málimet boıynsha, Sultan Sarsemalıev qyrkúıektiń ortasynde Jezqazǵan qalasynyń aýmaǵynda ornalasqan № 62 mekemesine jetkizilgen. Bul túrme ómir boıyna sottalǵandardy ustaýǵa arnalǵan mekeme retinde beıindelgen.
QR ІІM qylmystyq atqarý júıesi komıtetiniń málimetinshe, sottalǵan adam kúshine engen úkim negizinde sot belgilegen tıisti qaýipsizdik deńgeıindegi mekemede jazasyn ótep jatyr.
- Belgilengen tártipke sáıkes, sottalǵandardyń jaqyn týystaryna olardyń ornalasqan jeri jáne jazasyn óteý orny týraly habarlanady. Ózge aqparat, onyń ishinde sottalǵan adamnyń jeke isindegi málimetter jarııa etýge jatpaıdy. Sonymen qatar, Ulytaý oblysynda ómir boıyna bas bostandyǵynan aıyrýǵa sottalǵan adamdardy ustaýǵa arnalǵan mekeme qaıta beıindelgenin habarlaımyz, - dedi QR ІІM qylmystyq atqarý júıesi komıteti.
Eske salaıyq, qyrkúıek aıynyń basynda Sultan Sarsemalıevti ómir boıyna bas bostandyǵynan aıyrý týraly úkim kúshine endi. Ata-enesi men áıeliniń baýyrlaryn óltirgen sottalýshy apellıatsııalyq shaǵym jazǵan joq.
